"ბასიანთან" სამი ადამიანის დაჭრაში ბრალდებული სასამართლოს მდინარაძემ გააშვებინა?

"ბასიანთან" სამი ადამიანის დაჭრაში ბრალდებული სასამართლოს მდინარაძემ გააშვებინა? - რას ამბობს უმრავლესობის დეპუტატი

პოლიტიკა - 17:21, 17 Jan, 2018

6867

საპარლამენტო უმრავლესობის ლიდერი, მამუკა მდინარაძე მედიაში გავრცელებულ ინფორმაციას, რომ თბილისის საქალაქო სასამართლომ "ბასიანთან" სამი პირის დაჭრაში ბრალდებული თამაზ ქვლივიძე მისი პატრონაჟით გაათავისუფლა "ნიუპოსტთან" სიცრუეს და შეურაცხყოფას უწოდებს.

დეპუტატი აღნიშნავს, რომ ბრალდებულს და მის ოჯახს არ იცნობს, რაც შეეხება თამაზ ქვლივიძის ადვოკატს, ზაზა მესხს, მმართველი პარტიის ერთ-ერთი ლიდერი მასთან ნაცნობობას და წარსულში თანამშრომლობას ადასტურებს.

"არ შეიძლება ასეთ ამბებზე სერიოზული კომენტარის გაკეთება, ეს არის აბსურდი და ამაზე ჩემი მხრიდან განმარტებების გაკეთება საკუთარი თავის და მათ შორის ჟურნალისტის შეურაცხყოფაა, რომ დავდგე და სერიოზული კომენტარები ვაკეთო - უიმე, მე არ გამიშვიათქო თუ რა უნდა გითხრათ?! რაც შეეხება ზაზა მესხს, ის წლების წინ ვაკე-საბურთალოს საგამოძიებოს უფროსი იყო, მე კი გამომძიებელი"- განუცხადა "ნიუპოსტს" მამუკა მდინარაძემ.

დეპუტატი ასევე უარყოფს ინფორმაციას, რომ ზაზა მესხი მის ყოფილ საადვოკატო ფირმაში მუშაობს.

"დავიწყოთ იქიდან, რომ მე საადვოკატო ფირმა არ მაქვს, წილები გავყიდე, თუმცა რომც მქონდეს, ჩემს ფირმაში ბატონი ზაზა არ მუშაობს"- დასძინა მამუკა მდინარაძემ.

შეგახსენებთ, თბილისის სააპელაციო სასამართლომ კლუბ "ბასიანთან" დაცვის ორი წევრისა და ერთი პოლიციელის დაჭრაში ბრალდებულ თამაზ ქვლივიძეს აღკვეთის ღონისძიების სახით პატიმრობა შეუფარდა.

15 იანვარს თბილისის საქალაქო სასამართლომ თამაზ ქვლივიძეს აღკვეთის ღონისძიების სახით 30 000 ლარის ოდენობით გირაო შეუფარდა, რასაც საზოგადოების, პოლიტიკოსებისა და არასამთავრობოების პროტესტი მოჰყვა, რის შემდეგაც პროკურატურამ საქალაქო სასამართლოს გადაწყვეტილება სააპელაციოში გაასაჩივრა.