კორუფციის რისკი საზოგადოებრივ მაუწყებელში - რა შენიშვნები აქვს პრეზიდენტს კანონპროექტთან დაკავშირებით

პოლიტიკა - 16:56, 16 Jan, 2018

930

საზოგადოებრივ მაუწყებელთან დაკავშირებულ კანონპროექტში, რომელიც სახელმწიფო შესყიდვების მიმართულებით ცვლილებებსაც ითვალისწინებს, საქართველოს პრეზიდენტი კორუფციის საფრთხეს ხედავს.

პრეზიდენტის შეფასებით, საზოგადოებრივი მაუწყებლის ”სახელმწიფო შესყიდვების შესახებ” კანონიდან გასვლა მნიშვნელოვნად გაზრდის კორუფციის რისკს და მის წინააღმდეგ ბრძოლის ეფექტიანობას შეასუსტებს. აღნიშნულ თემაზე საუბარია იმ მოტივირებულ შენიშვნებში, რომელიც პრეზიდენტმა კანონთან დაკავშირებით პარლამენტს გადაუგზავნა.

“ხდება სახელმწიფო შესყიდვების ნაწილის არამხოლოდ კონკრეტული კანონის მოქმედების ჩარჩოდან გამოყვანა, არამედ ამ ტიპის სახელმწიფო შესყიდვების გამოყვანა უმნიშვნელოვანესი პრინციპების მოქმედების სფეროდანაც, რაც გაუმართლებელია. კომიტეტის დასკვნის მიხედვით, ამ ტიპის შესყიდვების გამოყვანა სახელმწიფო შესყიდვების კანონის რეგულირების სფეროდან გამომდინარეობს 2014/24/EU დირექტივიდან. ნებისმიერი გამონაკლისი, რომელსაც ეს დირექტივა უშვებს, უნდა აკმაყოფილებდეს გარკვეულ სტანდარტებს, როგორებიცაა: თანასწორობა, სამართლიანობა და გამჭვირვალობა. თუმცა, შემოთავაზებულ კანონპროექტში არანაირი, მინიმალური გარანტიაც კი, რომ შესყიდვების პროცესში ეს პრინციპები დაცული იქნება, მოცემული არ არის. საქართველოს ანტიკორუფციული სტრატეგიის თანახმად, სახელმწიფო შესყიდვები არის კორუფციისადმი ერთ-ერთი ყველაზე მოწყვლადი სფერო. შესაბამისად, სახელმწიფო შესყიდვების სისტემის გამართული ფუნქციონირება უმნიშვნელოვანესია ქვეყნის სტრატეგიული განვითარებისთვის, ვინაიდან ეფექტიანი სახელმწიფო შესყიდვების სისტემის საშუალებით შესაძლებელია დაიზოგოს საჯარო სახსრები და თავიდან იქნეს აცილებული საბიუჯეტო თანხების არამიზნობრივი, არაეკონომიური ხარჯვა. ქვეყნის გრძელვადიანი მიზნებია: სახელმწიფო შესყიდვების ერთიანი ელექტრონული სისტემის დახვეწა, გამჭვირვალობის მაღალი დონის შენარჩუნება, სახელმწიფო შესყიდვების პროცესში არადისკრიმინაციული მიდგომისა და ჯანსაღი კონკურენციის უზრუნველყოფა, კორუფციული რისკის მინიმუმამდე დაყვანა. შესაბამისად, ნათელია, რომ წარმოდგენილი კანონპროექტი მნიშვნელოვნად გაზრდის კორუფციის რისკს და შეასუსტებს მის წინააღმდეგ ბრძოლის ეფექტიანობას, რაც ეწინააღმდეგება სახელმწიფოს პოლიტიკას კორუფციასთან ბრძოლის მიმართულებით და უკან გადადგმული ნაბიჯი იქნება იმ გზაზე, რომელზეც საქართველომ, არაერთი ავტორიტეტული წყაროს თანახმად, მნიშვნელოვან პროგრესს მიაღწია. ამგვარად, გაუმართლებლად მიგვაჩნია, სახელმწიფო შესყიდვების ერთი ნაწილი გამოვიდეს არსებული რეგულაციების სფეროდან ისე, რომ კანონმდებლობით არ იყოს დადგენილი ის მინიმალური სტანდარტებიც კი, რომლებიც ამ შემთხვევაში უნდა იყოს დაცული. ასეთი მიდგომა ეწინააღმდეგება, როგორც ასოცირების ხელშეკრულების სულისკვეთებას, ისე კორუფციასთან ბრძოლის ეროვნულ სტრატეგიას.“ - აღნიშნულია პრეზიდენტის მოტივირებულ შენიშვნებში.

აღნიშნულ კანონპროექტის საკუთარ ვარიანტში პრეზიდენტი პარლამენტს სთავაზობს, რომ საზოგადოებრივი მაუწყებელმა ტელერადიოპროდუქცია და მასთან დაკავშირებულ მომსახურება “სახელმწიფო შესყიდვების შესახებ“ კანონის შესაბამისად შეისყიდოს, გარდა იმ შემთხვევებისა, როდესაც შესყიდვა არარეზიდენტი პირისგან ხორციელდება.