სააკაშვილის ექსტრადირება და გასაიდუმლოებული ვიზიტი უკრაინაში - ვის შეხვდნენ პროკურატურის მაღალჩინოსნები კიევში

პოლიტიკა - 13:55, 15 Jan, 2018

3425

უკრაინის „ახალ ძალთა მოძრაობის“ ლიდერი, საქართველოს მესამე პრეზიდენტი, მიხეილ სააკაშვილი უკრაინისა და საქართველოს ხელისუფლების საზრუნავი და მთავარი თავსატეხია.

ანალიტიკოსთა შეფასებით, პეტრო ალექსეევიჩ პოროშენკოს თავის ნაბიჯებით საკუთარი თავი სულ უფრო ღრმად შეჰყავს ჩიხში. წუხს ივანიშვილიც, რადგან მოწინააღმდეგის "განეიტრალება" ამ დრომდე ვერ შეძლეს.

იგეგმება თუ არა მიხეილ სააკაშვილის ექსტრადიცია? რას აკეთებს საქართველოს ხელისუფლება სააკაშვილის ჩამოსაყვანად და უკავშირდება თუ არა უკრაინის პირველი პირების გახშირებული ვიზიტები თბილისში სააკაშვილის ფაქტორს? - ეს ის კითხვებია, რაც საზოგადოებას ყველაზე მეტად აინტერესებს.

უკრაინის პრეზიდენტი არ მალავს, რომ სააკაშვილის საქმიანობით უკმაყოფილოა. პეტრო პოროშენკოს და საქართველოს ხელისუფლების ფარული მოლაპარაკების შესახებ საუბრისას, თავად მიხეილ სააკაშვილიც.

საქართველოს მესამე პრეზიდენტი და „ნაციონალური მოძრაობა“ პოროშენკოს და ბიძინა ივანიშვილის არაოფიციალური კონტაქტებზე ამახვილებენ ყურადღებას.

სააკაშვილის განცხადებაში ლოგიკა ნამდვილად არის - მიხეილ სააკაშვილის გუბერნატორობიდან წასვლის და ოპოზიციური აქტიურობის ფონზე პეტრო პოროშენკო თბილისში ჩამოვიდა და პირველ პირებთან შეხვედრა გამართა.

ვიზიტიდან მალევე მიხეილ სააკაშვილის სასამართლო პროცესები თბილისსა და კიევში ერთდროულად ფორსირებულ რეჟიმში მიმდინარეობს.

დასრულდება თუ არა უკრაინისა და საქართველოს ხელისუფლების მოლაპარაკებები სააკაშვილის საქართველოში ექსტრადირებით უცნობია, თუმცა ფაქტია, რომ საქართველოს მთავარი პროკურატურის მაღალჩინოსნები აქტიურ კომუნიკაციაში არიან უკრაინელ კოლეგებთან.

„ნიუპოსტისთვის“ ცნობილი გახდა, რომ 11 იანვარს საქართველოდან უკრაინაში შოთაძის უწყების 5 მაღალჩინოსანი ჩაფრინდა.

„ნიუპოსტის“ წყარო ყვება, რომ მთავარი პროკურორის მოადგილე გორგი გოგაძე, საქართველოს მთავარი პროკურატურის გენერალური ინსპექციის უფროსი ბაკურ აბულაძე, მთავარი პროკურატურის სამართლებრივი უზრუნველყოფის დეპარტამენტის უფროსი ირაკლი ჩილინგარაშვილი, პროკურატურის საგამოძიებო ნაწილის უფროსის მოადგილე დიმიტრი ფაღავა და საზოგადოებასთან და მასმედიასთან ურთიერთობის დეპარტამენტის უფროსის მოადგილე გიორგი გრძელიშვილი გენერალურ პროკურორს იური ლუცენკოს პირადად შეხვდნან და სააკაშვილის საკითხი განიხილეს.

,,ნიუპოსტი" დეტალებისთვის გიორგი გრძელიშვილს დაუკავშირდა, რომელმაც ჯერ ვიზიტის შესახებ გაკვირვება გამოხატა, ხოლო შემდეგ უკრაინაში ვიზიტი დაადასტურა, მაგრამ დეტალებზე საუბრისგან თავი შეიკავა.