უკრაინის პრეზიდენტმა პეტრო პოროშენკომ რუსთავი2-ის გადაცემა "შაბათის კურიერში" გასულ სიუჟეტთან დაკავშირებით საგანგებო განცხადება გაავრცელა.

პრეზიდენტის საიტზე განთავსებულ განცხადებაში ნათქვამია, რომ გამოქვეყნებული დოკუმენტები არის რუსეთის სპეცსამსახურის მიერ მომზადებული და შემოგდებული დაბალი დონის სიყალბე.

პრესსამსახურის განცხადებაში ნათქვამია, რომ ФСБ-ს სიყალბეს ყველაზე მეტად ის ფაქტი ადასტურებს, რომ პეტრე პოროშენკოს შვილი, ალექსეი კიევში 2013 წლის სექტემბერში დაქორწინდა, გავრცელებულ დოკუმენტში კი, რომელიც 2007 წლით თარიღდება, პეტერბურგში მცხოვრები პოროშენკოს რძლის ნათესავებია მოხსენიებული.

"მოვუწოდებთ საინფორმაციო საშუალებებს, არ გაავრცელონ ყალბი ინფორმაცია, რომელიც აგრესორი ქვეყნის მხრიდან აშკარად დაკვეთილ ხასიათს ატარებს. იმ მედიასაშუალებების მიერ კი, რომლებმაც გადაუმოწმებელი ცნობა გაავრცელეს, საჯარო ბოდიშს ველით," - წერია პეტრე პოროშენკოს ადმინისტრაციის ოფიციალურ ვებგვერდზე გამოქვეყნებულ განცხადებაში.