პანკისის რეგიონის გაუცხოება და საერთაშორისო იმიჯის შელახვა - ექსპერტი რუსულ ფაქტორებსა და შესაძლო საფრთხეებზე საუბრობს

პოლიტიკა - 15:53, 11 Jan, 2018

1286

საქართველოს სტრატეგიული ანალიზის დამფუძნებელი ნოდარ ხარშილაძე პანკისსა და თბილისში ჩატარებულ სპეცოპერაციაზე საუბრობს და ამბობს, რომ იმ შემთხვევაში, თუ ხელისუფლება გამოძიების სამართლიანად წარმართვას და მოსახლეობის სათანადოდ ინფორმირებას ვერ შეძლებს, სიტუაცია რეგიონში დაიძაბება და ამასთან, შესაძლოა, საქართველოს საერთაშორისო იმიჯის შელახოს.

"ნებისმიერი სპეცოპერაციის მიზანი უნდა ემსახურებოდეს ქვეყნის ინტერესებს. ამ სამიდან კი აშკარაა ორი პრობლემა, რომელიც საქართველოს ინტერესებში არ შედის. პირველი - ჩვენ, როგორც საზოგადოებას ისე სახელმწიფოს, პანკისის რეგიონის გაუცხოება და იქ მცხოვრებ ეთნიკური უმცირესობის ორგანიზებულ ჯგუფად ჩამოყალიბება არაფერში არ გვაწყობს, რომლებიც თავის ფილოსოფიად ანტისახელმწიფოებრივ ნაბიჯებს აირჩევენ. ამ ხალხის გადამტერება სახელმწიფოს არ აწყობს. მეორე პრობლემა - ესაა საქართველოს საერთაშორისო იმიჯის შელახვა. ნამდვილად არაფერში გვაწყობს, იმ ინფორმაციის გავრცელება, რომ საქართველო ტერორისტების თავშესაფარი ქვეყანაა და პანკისის რეგიონში ხდება ტერორისტების მომზადება ან მათი ტრანსპორტირბა საქართველოს გავლით ხორციელდება. ამის მაგალითები 2000 -იან წლებში გვქონდა, როცა ანტიტერორისტული ოპერაცია ჩატარდა, რუსეთი ამას აქტიურად იყენებდა და იმავეს გააკეთებს დღესაც - მოიშველიებს ჩვენს მიერ ოფიციალურ გავრცელებულ ინფორმაციას. მე ვერ გეტყვით, რა გზებით უნდა აარიდონ თავი ამ პრობლემებს, ეს ცალკე განხილვის თემაა, მაგრამ იმიტომ ვაფინანსებთ ჩვენ სპეცსამსახურებს ამ ხალხმა ქვეყანას პრობლემები არ შეუქმნას"- განაცხადა ნოდარ ხარშილაძემ "ნიუპოსტთან".