„რა შედეგითაც უნდა დასრულდეს გამოძიება, მინდა, სამძიმარი ვუთხრა მაჩალიკაშვილის ოჯახს“

„რა შედეგითაც უნდა დასრულდეს გამოძიება, მინდა, სამძიმარი ვუთხრა მაჩალიკაშვილის ოჯახს“ - პრემიერი

პოლიტიკა - 10:56, 11 Jan, 2018

1236

პანკისის სპეცოპერაციისას დაჭრილი 19 წლის თემირლან მაჩალიკაშვილის გარდაცვალებას საქართველოს პრემიერ-მინისტრი გამოეხმაურა. გიორგი კვირიკაშვილმა ტერორიზმს საქართველოსა და მსოფლიოსთვის მნიშვნელოვანი გამოწვევა უწოდა. პრემიერის თქმით, სახელმწიფომ და ექიმებმა ყველაფერი გააკეთეს თემირლან მაჩალიკაშვილის სიცოცხლის შესანარჩუნებლად, თუმცა მისი გადარჩენა ვერ მოხერხდა. კვირიკაშვილის განცხადებით, რა შედეგითაც უნდა დასრულდეს გამოძიება, ის მაჩალიკაშვილის ოჯახს უსამძიმრებს:

„მინდა, შევეხო ჩვენი ქვეყნისა და ჩვენი სახელმწიფოსთვის ძალიან მნიშვნელოვან თემას - ეს არის ტერორიზმი - გამოწვევა მთელი მსოფლიოსთვის. ჩვენი სახელმწიფოც ყველაფერს აკეთებს ამ საფრთხის თავიდან ასაცილებლად. რა თქმა უნდა, როდესაც ამ გამოწვევასთან ბრძოლა საკუთარ ქვეყანაში გიწევს, მით უფრო, როდესაც საკითხი ეხება ჩვენს მოქალაქეებს, ის არის ძალიან მგრძნობიარე და საფრთხილო.

ჩვენმა სპეცსამსახურებმა ჩაატარეს რამდენიმე სპეცოპერაცია და თითოეული მათგანი სწორედ ტერორისტული საფრთხეების თავიდან აცილებას ეხებოდა. ამ ოპერაციებს შეეწირა ჩვენი სპეცსამსახურების ერთი თანამშრომელი და დაგვეჭრა - ოთხი. ეს ბიჭები საკუთარი სიცოცხლის ფასად იცავდნენ ჩვენი მოქალაქეების უსაფრთხოებას.

მინდა, ცალსახად განვაცხადო, რომ პირველ რიგში არის სწორედ ხელისუფლების ინტერესი, რომ პროკურატურის ობიექტურმა და ეფექტიანმა გამოძიებამ საზოგადოებაში არსებულ ყველა შეკითხვას მაქსიმალურად მოკლე დროში გასცეს პასუხები. ამიტომაც, დღეს, ამ ვითარებაში, წინასწარი განცხადებების თუ წინასწარი დასკვნების გაკეთება აზიანებს სახელწიფო ინტერესებს.

სამწუხაროა, რომ ვერ მოხერხდა ოპერაციის დროს დაჭრილი თემირლან მაჩალიკაშვილის გადარჩენა, თუმცა, სახელმწიფომ და ექიმებმა ყველაფერი გააკეთეს მისი სიცოცხლის შესანარჩუნებლად. და რა შედეგითაც არ უნდა დასრულდეს გამოძიება, მინდა, სამძიმარი ვუთხრა მის ოჯახს.“- განაცხადა პრემიერმა.