მოქალაქეობის მინიჭებასთან დაკავშირებით მარგველაშვილის პოლიტიკას წულუკიანი ნეგატიურად აფასებს

პოლიტიკა - 15:42, 10 Jan, 2018

1455

თეა წულუკიანის განცხადებით სერვისების განვითარების სააგენტოს დადებითი დასკვნის მიუხედავად, საქართველოს პრეზიდენტმა 2017 წელს საქართველოს მოქალაქეობის მინიჭებაზე უარი 565 პირს უთხრა. აღნიშნული განცხადება იუსტიციის მინისტრმა დღეს გამართულ ბრიფინგზე გააკეთა. როგორც წულუკიანმა აღნიშნა 565 პირიდან 89% საქართველოს ყოფილი მოქალაქე, საქართველოში დაბადებული ან მათი ოჯახის წევრი იყო. მინისტრმა პრეზიდენრის პოლიტიკა ნეგატიურად შეაფასა და იმედი გამოთქვა, რომ მას შემდეგ რაც მოქალაქეობის საკითხთა კომისია სახელმწიფო სერვისების განვითარების სააგენტოდან საქართველოს პრეზიდენტის ადმინისტრაციაში გადავა, მარგველაშვილი გასულ წელს წარმოებულ პოლიტიკას არ გააგრძელებს და მას პოზიტიური და სამართლიანი დინამიკით შეცვლის:

„ამგვარი პოლიტიკა, ვფიქრობ, ეწინააღმდეგება კონსტიტუციის სულისკვეთებას, რომლის თანახმადაც საქართველოს მოქალაქეობა საგამონაკლისო წესით მიენიჭებათ მათ, ვისთან მიმართებაშიც სახელმწიფო ინტერესი არსებობს. ჩვენ ვთლიდით და ახლაც ვთვლით, რომ საქართველოს ყოფილი მოქალაქისთვის, საქართველოში დაბადებული პირისთვის, საქართველოს მოქალაქის ოჯახის წევრისთვის საქართველოს მოქალაქეობის მინიჭება სახელმწიფო ინტერესია, რადგან ეს ადამიანები ომიანობის, ეკონომიკური სიდუხჭირის ან სხვა გარდაუვალი სირთულის გამო დროებით დაშორდნენ სამშობლოს და სურთ დაბრუნება. მათ ჩვენ კარი უნდა გავუხსნათ. იმედი მაქვს, რომ კომისიის თავისთან გადატანით, საქართველოს პრეზიდენტი მის მიერ გასულ წელს წარმოებულ პოლიტიკას არ გააგრძელებს და მას პოზიტიური და სამართლიანი დინამიკით შეცვლის.“- განაცხადა თეა წულუკიანმა.