თემირლან მაჩალიკაშვილის გარდაცვალებასთან დაკავშრებით საპარლამენტო ოპოზიციის რიგებში კომენტარები კეთდება. ფრაქცია „ევროპული საქართველოს“ ერთ-ერთი ლიდერი სერგი კაპანაძე აცხადებს, რომ არსებობს ორი ტიპის კითხვები, ერთი მათგანი უკავშირდება აჰმედ ცატაევის საკითხს, მეორე კი სპეცოპერაციის თემას:

„არსებობს ორი ტიპის კითხვები, პირველი ეხება ისევ და ისევ ჩატაევთან დაკავშირებულ ისტორიას, როგორ იქნა ის ჯერ გაშვებული ციხიდან, შემდეგ როგორ მოხდა მისი წასვლა საქართველოდან, შემდეგ როგორ მოხდა მისი დაბრუნება საქართველოში იმ ფონზე, როდესაც იყო შავ სიაში შეყვანილი ძალიან ბევრი საერთაშორისო ორგანიზაციის და ჩვენი პარტნიორების მიერ, ეს არის მტავარი კითხვები, რომლებსაც პოლიტიკური პასუხი უნდა გაეცეს და რომელზეც უნდა დადგეს პოლიტიკური პასუხისმგებლობის საკითხი იმ ადამიანების, ვინც ამაში არიან ჩართულები.

გარდა ამისა, ბუნებრივია არის კიდევ სხვა ტიპის კითხვები, ძალის გადამეტებასთან დაკავშირებით, იმიტომ, რომ ამ კონკრეტული სპეცოპერაციის დროს ლეგიტიმური კითხვები გაჩნდა. იყო თუ არა ძალის ისეთი გამოყენება, როგორც მოხდა, რამაც შემდგომ გამოიწვია ამ ახალგაზრდა ადამიანის გარდაცვალება“, - აღნიშნავს სერგი კაპანაძე.