ახალგორში შესული ტვირთების გასაკონტროლებლად საოკუპაციო რეჟიმი საბაჟო პუნქტს ხსნის

პოლიტიკა - 17:20, 09 Jan, 2018

1615

ოკუპირებული ცხინვალის რეგიონის ე.წ საბაჟო სამსახური კვირის განმავლობაში ე.წ საზღვარზე სოფელ მოსაბრუნთან („რაზდახანი“) ახალ საბაჟო პუნქტს ხსნის. ოკუპირებული რეგიონის მედიის ცნობით ამის შესახებ გადაწყვეტილების მიღება ე.წ ხელისუფლების გაფართოებულ სხდომაზე მოხდა.

ე.წ საბაჟო კომიტეტის ხელმძღვანელის მურატ ცხოვრებოვის თქმით: „საქართველოსთან საზღვარი უკვე აღჭურვილია ვაგონებით, რომლებშიც საბაჟო სამსახურის თანამშრომლები განთასდებიან და შეამოწმებენ ტვირთს და პროდუქციას, რომელმაც საზღვარი უნდა გადაკვეთოს.“

ცხინვალის საოკუპაციო რეჟიმის ბრძანებით, ახალგორის რაიონის მაცხოვრებლებს უფლება აქვთ ე.წ საზღვარზე ერთ ადამიანზე 50კგ-მდე ტვირთი გადაიტანონ. იმის გამო, რომ მესაზღვრეებს ამ ტვირთის გაკონტროლების და აწონვის უფლება არ აქვთ, ამ საქმით მებაჟეები დაკავდებიან. ამასთანავე ახალგორის რაიონში საქართველოს კონტროლირებადი ტერიტორიიდან იკრძალება მეცხოველეობის პროდუქტების შეტანა, მათ შორის, შინაური ცხოველების შეყვანა. ამის გაკონტროლების მიზნით, მებაჟეებთან ერთად, საბაჟო პუნქტზე „იუგოსელხოზნადზორის“ თანამშრომლებიც იქნებიან.