საქართველოს პრეზიდენტმა გიორგი მარგველაშვილმა ანა ნაცვლიშვილი საპარლამენტო მდივნის თანამდებობაზე წარადგინა. „ერთიანი ნაციონალური მოძრაობის“ პოლიტიკური საბჭოს წევრი ნინო კალანდაძე აღნიშნულის შეფასებისას აღნიშნავს, რომ ახალ საპარლამენტო მდივანსა და საპარლამენტო უმრავლესობას შორის სახელმწიფოებრივი თანამშრომლობის ილუზია არ აქვს:

„იმ ვითარებაში, რასაც ჩვენ მთელი ამ წლების განმავლობაში ვუყურებთ, რა დამოკიდებულებას იჩენს „ქართული ოცნება“ პრეზიდენტის მიმართ, პრეზიდენტის ინსტიტუტის მიმართ, ნებისმიერი წარმომადგენლის მიმართ, რომელიც პრეზიდენტის ინიციატივას აჟღერებს, არანაირი ილუზია არ მაქვს, რომ აქ ან რაიმე ფორმით სახელმწიფოებრივი თანამშრომლობა შედგება,“ - განაცხადა ნინო კალანდაძემ.

პარლამენტის ფრაქცია „ევროპული საქართველოს“ წევრი, სერგო რატიანი პრეზიდენტის საპარლამენტო მდივნად ანა ნაცვლიშვილის დანიშვნას მიესალმება.

„ვფიქრობ, რომ ანაც გააგრძელებს ამ ტრადიციას და ის იქნება პრინციპული იმ საკითხებთან დაკავშირებით, რაც აინტერესებს საზოგადოებას... ამ შემთხვევაშიც უნდა გაგრძელდეს იგივე მიდგომები და ხელისუფლების ასარჩევი არის, რამდენად ნორმალურ სახეს მიიღებს ეს ურთიერთობა,“ - განაცხადა სერგო რატიანმა.