სასამართლოებში საქმეთა გაჭიანურება ძალიან დიდი სისტემური პრობლემაა

სასამართლოებში საქმეთა გაჭიანურება ძალიან დიდი სისტემური პრობლემაა - ანა დოლიძე

პოლიტიკა - 15:13, 08 Jan, 2018

1174

იუსტიციის უმაღლესი საბჭოს არამოსამართლე წევრი ანა დოლიძე საქართველოს პრეზიდენტს ნდობისთვის მადლობას უხდის.

სპეციალურ ბრიფინგზე დოლიძემ სისტემაში არსებულ პრობლემებსა და გამოწვევებზე ისაუბრა.

„ბუნებრივია ეს პოზიცია საბჭოს წევრს აკისრებს ძალიან დიდ პასუხისმგებლობას, ის არის დიდი პრივილეგია და მე მოგახსენებთ იმ სამ ამოცანას, რომელიც უამრავი სფეროდან, რომელიც ეხება იუსტიციის საბჭოს სასამართლოსთან მიმართებაში, ჩემს ყველაზე მთავარ ამოცანებად მიმაჩნია.

სასამართლო ხელისუფლების ფუნქციაა, ეფექტიანი და ხარისხიანი მართლმსაჯულების უზრუნველყოფა. ამ მხრივ ჩვენი ბევრი მოქალაქე ყოველდღე ელოდება განაჩენს, გადაწყვეტილებას ჩვენი სასამართლოებიდან და ეს მოლოდინი ხშირად თვეები და წლებიც კი გრძელდება. საქმეთა გაჭიანურება არის ძალიან დიდი სისტემური პრობლემა, რომელსაც ყველა ჩვენი მოქალაქე, რომელსაც შეხება ჰქონია სასამართლოსთან, თავის თავზე განიცდის. აქედან გამომდინარე ჩემი მთავარი ამოცანა იქნება, რომ სასამართლომ გასწიოს ისეთის მომსახურება, რომელიც იქნება დროული და იქნება ხარისხიანი.

მეორე ამოცანა უკავშირდება პრეზიდენტის მიერ გამოთქმულ მოსაზრებებს და სასამართლო ხელისუფლების, კონკრეტულად იუსტიციის უმაღლესი საბჭოს მიმართ ნდობის ამაღლებას, რომელიც პირველ რიგში მისი გახსნილობით და ხალხის წინაშე ანგარიშვალდებულებით უნდა მოხდეს. საბჭოს დღეს აკრიტიკებენ, რომ ხშირად არ არის შესაბამისად გახსნილი და ანგარიშვალდებული და ჩემი მეორე ამოცანა უნდა იყოს ამ გახსნილობის და ხალხის წინაშე ანგარიშვალდებულების უზრუნველყოფა; მესამე ამოცანა ასევე უკავშირდება სასამართლო ხელისუფლების მიმართ ნდობის გაზრდას და სასამართლოს ავტორიტეტის გაზრდას იმით, რომ სასამართლოს ხელისუფლებაში მოვიდნენ მხოლოდ პროფესიული კომპეტენციით და ღირსებით გამორჩეული ადამიანები, ისინი დაწინაურდნენ და წახალისდნენ”,- განაცხადა ანა დოლიძემ.

მისივე თქმით, კიდევ ერთი ნაბიჯი იქნება სასამართლოს, ხელისუფლების და იუსტიციის საბჭოს მიერ ნდობის ამაღლება, რომელიც დოლიძის განცხადებით, უნდა მოხდეს საბჭოს გახსნილობით და საზოგადოების მიმართ ანგარიშვალდებულებით.