„არ მგონია, პრეზიდენტი იმაზე მეტად იყოს შეშფოთებული, ვიდრე ევროპული სასამართლო"

„არ მგონია, პრეზიდენტი იმაზე მეტად იყოს შეშფოთებული, ვიდრე ევროპული სასამართლო" - ოცნების პასუხი მარგველაშვილს

პოლიტიკა - 19:17, 05 Jan, 2018

1894

მიხეილ სააკაშვილის განაჩენზე გაკეთებული განცხადების გამო "ქართული ოცნება" პრეზიდენტს უპირისპირდება.

ფრაქცია ”ქართული ოცნების” წევრი, ანრი ოხანაშვილი ამბობს: „არ მგონია, პრეზიდენტი იმაზე მეტად იყოს შეშფოთებული, ვიდრე ადამიანის უფლებათა ევროპული სასამართლო".

„არ მგონია, პრეზიდენტი იმაზე მეტად იყოს შეშფოთებული, ვიდრე ადამიანის უფლებათა ევროპული სასამართლო, როდესაც თავის დროზე, ევროსასამართლოს გადაწყვეტილებაში წერია, რომ ის შეშფოთებულია იმის გამო, რომ იკვეთებოდა ფაქტები და გარემოებები, როდესაც მთელი სახელმწიფო მანქანა, მთელი სახელმწიფო სტრუქტურები სანდრო გირგვლიანის საქმის ჩასაფარცხად და მათ შორის, პრეზიდენტიც, მის მიერ შეწყალების უფლების გამოყენებით მოქმედებდნენ ერთხმად,“ - განაცხადა ანრი ოხანაშვილმა.

პარლამენტის ფრაქცია ”ქართული ოცნების” თავმჯდომარის მოადგილე, დავით მათიკაშვილი კი გიორგი მარგველაშვილის საპასუხოდ აღნიშნავს, რომ საქალაქო სასამართლოს გადაწყვეტილება სპონტანურად არ მიუღია.

„ჩემი აზრით, უნდა დაველოდოთ დასაბუთებულ განაჩენს და სასამართლო ხელისუფლება ამ აქტით საზოგადოებას გააგებინებს ანუ მიცემს იმის საშუალებას, გაეცნოს ყველა არგუმენტს, თუ რატომ იყო ეს განაჩენი გამოტანილი ამ სახით. სანდრო გირგვლიანის მიმართ ჩადენილი დანაშაული ეს არის ერთგვარი პირდაპირი მაგალითი იმისა, თუ როგორ არ უნდა იქცეოდეს სახელმწიფო მისი მოქალაქის მიმართ,“ - განაცხადა დავით მათიკაშვილმა.