ტელეკომპანია „იბერიას“ ეთერში მომხდარი ინციდენტი, რამდენიმე კვირის წინ დავით ოქიტაშვილმა „ნაციონალური მოძრაობის“ პოლიტსაბჭოს წევრს ეკა წამალაშვილს პირდაპირ ეთერში წყალი შეასხა და სიტყვიერი შეურაცხყოფა მიაყენა, წამალაშვილი პროკურატურას აღნიშნული საქმის გამოძიების გაჭიანურებაში ადანაშაულებს. წამალაშვილი პროკურატურისგან დაზარალებულად ცნობას ითხოვს:

„მე მითხრეს, რომ 28 დეკემბერს უკვე უნდა ყოფილიყო პროკურორის გადაწყვეტილება ჩემს დაზარალებულად ცნობასთან დაკავშირებით, გუშინაც დავურეკე გამომძიებელს და მითხრა, რომ გადაწყვეტილება ჯერ არ არის მიღებული. საქმე გვაქვს უკვე საქმის ხელოვნურად გაჭიანურებასთან, რადგან ყველა გონივრული ვადა ამოწურულია, არაფერი მანდ ისეთი გამოსაძიებელი არ იყო. მოწმეები დაკითხულები არიან,“ - განაცხადა ეკა წამალაშვილმა.

საქმის მიმდინარეობასთან დაკავშირებით ინფორმაციას არ ფლობს დავით ოქიტაშვილის და ხათუნა ხოფერიას ადვოკატი:

„გამოძიების გასარკვევი თემაა, არ ვიცი რა გამოიძია, რა დაადგინა. მე დავესწარი ოქიტაშვილის და ხოფერიას გამოკითხვას. თვლიან, რომ არ არიან დამნაშავეები. ფიზიკურ ძალადობას ადგილი არ ჰქონიაო ესენი აცხადებენ. რა მუხლითაც ესენი ედავებიან, ეს დანაშაულის შემადგენლობაში არ არის,“ - აცხადებს ადვოკატი შალვა ხაჭაპურიძე.