"სასამართლოს გადაწყვეტილებაში არავინ ჩაერევა" - ეკა ბესელია სააკაშვილის განაჩენზე

პოლიტიკა - 11:45, 05 Jan, 2018

1394

საპარლამენტო უმრავლესობის წევრი ეკა ბესელია საქართველოს მესამე პრეზიდენტის მიხეილ სააკაშვილისთვის საქალაქო სასამართლოს მიერ განაჩენის გამოტანას გამოეხმაურა.

მისი თქმით, სასამართლო გადაწყვეტილება ეყრდნობა მტკიცებულებებს.
"სტრასბურგის ადამიანის უფლებათა ევროპულმა სასამართლომ, როდესაც თავის დროზე იმსჯელა სანდრო გირგვლიანის საქმესთან დაკავშირებით სხვა გარემოებებთან ერთად, მათ შორის, ამ გადაწყვეტილებაში მიუთითა შეწყალების აქტის პოლიტიკურ შინაარსზე. ეს აქტიც განხილულია ევროსასამართლოს მიერ იმ კონტექსტში, რომ პრეზიდენტი, სასამართლო, პროკურატურა, გამოძიება - ყველა ერთხმად, შეთანხმებულად მუშაობდა ამ უდანაშუალო ახალგაზრდა ადამიანის წინააღმდეგ, რომ არ მომხდარიყო ამ საქმის ობიექტური გამოძიება. შეწყალების აქტზე სტრასბურგის სასამართლოს გადაწყვეტილებაშიც არის საუბარი და ეს არ არის აბსოლუტური უფლება, რაც კონსტიტუციით არსებობს, ამიტომ სასამართლოს კონკრეტული მტკიცებულებები ეყრდნობოდა ამ გადაწყვეტილების მიზანს. რაც შეეხება შემდეგ პროცედურებს, სასამართლო გადაწყვეტილების შემდეგომი ეტაპები დამოკიდებულია მხარეებზე, გაგრძელდება თუ არა სასამართლოში ამ გადაწყვეტილების ირგვლივ დავა. ჩვენ ვაკვირდებით ამ პროცესს და ბუნებრივია, სასამართლო გადაწყვეტილებაში არავინ ჩაერევა, გარდა სასამართლოსი. როდესაც სასამართლო მსჯელობს და იღებს გადაწყვეტილებას, უნდა ვნახოთ, რა წერია სასამართლოს გადაწყვეტილებაში, ფაქტები, მტკიცებულებები და როგორც გითხარით, აქ არა მხოლოდ შიდა ეროვნულმა სასამართლომ იმსჯელა ამ ფაქტზე, უფრო ადრე ევროპის ადამიანის უფლებათა სასამართლოს ყურადღებაც მიიპყრო ამ გადაწყვეტილებამ", - განაცხადა ბესელიამ.