„ბავშვი ამ დღეში ჩააგდეს და რაღაც ხომ უნდა შექმნან და თქვან" - მაჩალიკაშვილის მამა სუს-ის განცხადებაზე

პოლიტიკა - 18:12, 04 Jan, 2018

2641

პანკისში ჩატარებული სპეცოპერაციისას დაჭრილი 19 წლის თემირლან მაჩალიკაშვილის მამა სახელმწიფო უსაფრთხოების სამსახურის მიერ გავრცელებულ ვიდეომასალას ეხმაურება. როგორც მალხაზ მაჩალიკაშვილმა განაცხადა, მის შვილს საბანკო ანგარიში არ ჰქონია.

„მაგას საბანკო ანგარიში არ ჰქონია. მაგათ რა ამოიღეს, რა - არა, არ ვიცი. ევროპაში მეც მყავს საძმო, 100, 200 დოლარი თუ ვინმემ გამოგზავნა, ეგ იქნება, სხვა არანაირი საბანკო ანგარიში არ არის. ჩემგან გერმანიიდან ჩამოტანილი ფული აქვთ მაგათ წაღებული, დღეს აქ არის ჩამოსული ის, ვინც გერმანიაში 6 წელი იმყოფებოდა, ჩემი გოგო. უნდათ, რომ სადღაც ვითომ თემირლანის ფული იგზავნებოდა... ეს აბსურდია. ბავშვი ამ დღეში ჩააგდეს და რაღაც ხომ უნდა თქვან, რაღაც ხომ უნდა გააკეთონ, ხომ უნდა შექმნან, თბილისში თუ ჩეჩენია ყველა ერთმანეთს იცნობს. ბორზიევი ვინ არის არ ვიცი, არც მეორე ვიცი ვინ არის, საიდან უნდა ვიცოდე. გვარებით როგორ გითხრათ, არ ვიცნობ არც გვარებით არც სახელებით. ჩემი ჩეჩნური, ქისტური, კაცური, ალაჰის წინაშე ვაცხადებ, საქართველოს წინაშე - აზრადაც რომ მოსვლოდა ჩემს შვილს, სიზმრადაც რომ მოსვლოდა რაღაც ცუდის გაკეთება, მე მაგას ჩემი ხელით დავახრჩობდი ეს მინდა რომ გაიგოს საქართველოს მოსახლეობამ,“ - განაცხადა მაჩალიკაშვილის მამამ.