,,ჩატაევი და მისი დაჯგუფების წევრები ე.წ. მწვანე ზოლთან ზურაბ გორნაკაშვილმა მიიყვანა. მათ ეს შესაძლებლობა გამოიყენეს“

,,ჩატაევი და მისი დაჯგუფების წევრები ე.წ. მწვანე ზოლთან ზურაბ გორნაკაშვილმა მიიყვანა. მათ ეს შესაძლებლობა გამოიყენეს“ - სუსი

პოლიტიკა - 17:41, 04 Jan, 2018

2393

სახელმწიფო უსაფრთხოების სამსახურის ინფორმაციით, გამოძიების ამ ეტაპზე დადგენილია, რომ პანკისში ჩატარებული სპეცოპერაციისას დაკავებული ზურაბ გორნაკაშვილი თურქეთის ქალაქ ხოფაში ახმედ ჩატაევის და მისი დაჯგუფების წევრების დასახმარებლად პირადად ჩავიდა. ამასთან, დაჯგუფების წევრები მანქანით თურქეთ-საქართველოს საზღვართან, კირნათი-მარადიდის მწვანე ზოლთან მიიყვანა. ,,ე.წ. მწვანე ზოლი ნიშნავს იმ მონაკვეთს, სადაც საბაჟო და სასაზღვრო-გამშვები პუნქტები არ დგანან. არის ასეთი შესაძლებლობა და მათ ეს გამოიყენეს" - განაცხადა გიორგობიანმა.

„გორნაკაშვილი თბილისშიც უწევდა დახმარებას ახმედ ჩატაევს და მისი დაჯგუფების წევრებს. საგამოძიებო მოქმედებებით დადგენილია, რომ დაკავებული რუსლან ალდამოვი, ბადურ ჩოფანაშვილთან, რამაზ მარგოშვილსა და თემირლან მაჩალიკაშვილთან ერთად უშუალოდ ხელმძღვანელობდა ახმედ ჩატაევისა და მისი დაჯგუფების წევრების საქართველოში შემოყვანას, დაბინავებას, საცხოვრებელი ბინით, საკვებით, მობილური ტელეფონებით და სხვა საყოფაცხოვრებო პირობებით უზრუნველყოფას. ტერორიზმში ბრალდებულ ჯგუფთან კავშირზე მყოფი სხვა პირების გამოვლენის მიზნით საგამოძიებო მოქმედებები გრძელდება.“- აღნიშნულია სუს-ის მიერ გავრცლებულ ინფორმაციაში.

აღნიშნულ საქმეზე გამოძიება 331- ე პრიმა მუხლის მესამე ნაწილით მიმდინარეობს. რაც ტერორიზმის დაფინანსებას , ტერორისტული საქმიანობის სხვაგვარ მატერიალურ მხარდაჭერას ან რესურსებით უზრუნველყოფას გულისხმობს, რამაც მძიმე შედეგი გამოიწვია. სასჯელის ზომად 17 დან 20 წლამდე ვადით ან უვადო თავისუფლების აღკვეთას ითვალისწინებს