აზერბაიჯანმა შეშფოთება გამოთქვა პრემიერ კვირიკაშვილის განცხადებების გამო, რომლის მიხედვითაც, ფორსმაჟორულ ვითარებაში, რუსეთიდან სომხეთის მიმართულებით ტვირთები, ლარსის მაგივრად, როკის გვირაბიდან იმოძრავებს და მათ შორის გაივლის ოკუპირებულ ცხინვალსაც. აზერბაიჯანის მილი მეჯლისი გამოდის ინიციატივით, რომ გადაწყვეტილების მიღებამდე საკითხის დეტალური შესწავლა აზერბაიჯანი-საქართველოს პარლამენტთაშორის კომისიას დაევალოს.

საქართველო-აზერბაიჯანის პარლამენთტაშორისი მეგობრობის ჯგუფის თავმჯდომარე ზვიად ძიძიგური აღნიშნულ ინიციატივას ოფიციალური განცხადებით გამოეხმაურა.

"მინდა გამოვეხმაურო აზერბაიჯანის მილი-მეჯლისში გაჟღერებულ ინიციატივას და როგორც საქართველო-აზერბაიჯანის მეგობრობის ჯგუფის ხელმძღვანელმა, გამოვთქვა მზადყოფნა გავმართოთ კონსულტაციები ჩვენს აზერბაიჯანელ კოლეგებთან ყველა მნიშველოვან საკითხზე, რომელიც ორმხრივ ინტერესს წარმოადგენს.

მზად ვართ, უახლოეს მომავალში მსგავსი შეხვედრის ორგანიზებისთვის.

ხაზგასმით აღვნიშნავთ, რომ აზერბაიჯანთან თანამშრომლობას საქართველო უდიდეს მნიშვნელობას ანიჭებს და ორ ქვეყანას შორის არსებული მეგობრული ურთიერთობების შემდგომი გაღრმავება ჩვენი დღის წესიგის პრიორიტეტული საკითხია.

გამოვთქვამთ რწმენას, რომ ორმხრივი ურთიერთობების განვითარების პოზიტიური დინამიკა მომავალში კიდევ უფრო გაიზრდება და კიდევ ერთხელ ვადასტურებთ მზადყოფნას, აზერბაიჯანელ კოლეგებთან განვიხილოთ ყველა მნიშვნელოვანი საკითხი.​