სემეკ-მა ელექტროენერგიაზე გადასახადი მთელი საქართველოს მასშტაბით გაზარდა. 2018 წლის პირველი იანვრიდან მოსახლეობას, დაახლოებით, 1.56 თეთრით გაზრდილი ტარიფის გადახდა მოუწევს.

აღნიშნულ გადაწყვეტილებას „ნიუპოსტთან“ საუბრისას დიმიტრი შაშკინი აფასებს, რომელიც მომხდარს ხალხის დაცინვასა და ცინიზმს უწოდებს.

„ერთი უბედურება ისაა, რომ ამ გაღატაკებულ ქვეყანაში იზრდება დენის ტარიფი. რეალურად, ხალხს ძალიან უჭირს, წელს დაფიქსირდა თბილისში ყველაზე მეტი აბონენტი, რომელსაც დენი გადაუხდელობის გამო აქვს გათიშული, ანუ ხალხს უჭირს იმდენად, რომ ვერც ძველი ტარიფით ვერ იხდიდა გადასახადს.

მეორე უბედურება და პრობლემა ისაა, რომ ეს ხალხი მოატყუეს - დაპირდნენ 5-თეთრიან ტარიფს და მიიღეს 23 თეთრზე მეტი. ზუსტად 5 წლის წინ იყო დაპირება, რომ ტარიფი იქნებოდა 5 თეთრი.

მესამე უბედურება და პრობლემა ის არის, რომ ყველაფერ ამის შემდეგ დასცინიან ხალხს. ის კომენტარები, რომლებიც გაკეთდა, თუ რატომ გაიზარდა ტარიფი, ცინიზმი და დაცინვაა. ტარიფი გაიზარდა იმიტომ, რომ ბევრი ინვესტიცია შემოვა მომავალ წელს საქართველოშიო. რაც უფრო მეტი ინვესტიცია შემოვა, ბუნებრივია „თელასი“ უფრო მეტ ფულს იშოვის. „თელასი“ გააკეთებს მეტ ფულს და ხალხსაც წაართმევს უფრო მეტ ფულს. რაც უფრო მეტი მოთხოვნაა პროდუქტზე, მით უფრო მეტი მოგება გექნება. პირდაპირ გვითხრეს, რომ მომავალ წელს „თელასი“ იშოვის მეტ ფულს, მაგრამ იმისთვის, რომ მან მეტი იშოვოს, ხალხმა უნდა გადაუხადოს დიდი ტარიფითო. ასეთი ცინიზმი და დაცინვა არცერთ ქვეყანაში არ არსებობს“, - აცხადებს დიმიტრი შაშკინი.

დაპირებული 5-თეთრიანი ტარიფის ნაცვლად მიიღეს 23 თეთრზე მეტი