„რაღაც ხდება, მსგავსი კრებები ასე არ იმართება“ - რას ამბობს პანკისელი ჟურნალისტი ხეობაში ჩატარებულ სპეცოპერაციაზე

პოლიტიკა - 11:49, 27 Dec, 2017

6236

პანკისის ხეობაში გუშინ ჩატარებულ სპეცოპერაციასთან დაკავშირებით ადგილობრივებს კითხვები აქვთ: რატომ ესროლა სპეცრაზმმა 19 წლის მძინარე ახალგაზრდას და ჰქონდა თუ არა ადგილი უფლებამოსილების გადამეტება სამართალდამცავების მხრიდან?

„ნიუპოსტი“ პანკისის ხეობის მოსახლეობის განწყობაზე ადგილობრივ ჟურნალისტს ესაუბრა.

„ხეობაში ჩატარებული სპეცოპერაცის ირგვლივ კითხვები აქვთ, დამოკიდებულება ცუდია, რადგან დაჭრეს 19 წლის ახალგაზრდა. მომხდარის გამო დღეს რამდენიმე კრებაა ჩანიშნული, რომელზეც სამოქმედო გეგმასთან დაკავშირებით გარკვეული გადაწყვეტილება უნდა მიიღონ. აღსანიშნავია, რომ მსგავსი კრებები ასე არ იმართება, ეს იმას ნიშნავს , რომ რაღაც ხდება“, - აღნიშნა „ნიუპოსტთან“ პანკისელმა ჟურნალისტმა სულხან ბორძიკაშვილმა.

ბორძიკაშვილი აღნიშნავს, რომ მთელი ღამის განმავლობაში, თელავში, ალაზნის გამზირის მიმდებარე ტერიტორიაზე სპეცდანიშნულების რამდენიმე ათეული მანქანა იმყოფებოდა.

ჟურნალისტის ინფორმაციით, სამართალდამცველების მობილიზება ვითარების შესაძლო დაძაბვას უკავშირდებოდა.

„ალბათ, ფიქრობენ, რომ პანკისში შეიძლება სიტუაცია დაიძაბოს,“ - ამბობს რესპოდენტი.

სულხან ბორძიკაშვილის თქმით, როგორც კი 19 წლის თემირლან მაჩალიკაშვილის მდგომარეობა გაირკვევა, ოჯახი აუცილებლად იმოქმედებს.

„ჩემი აზრით, ეს მოქმედებები ჩაჯდება კანონიერ ჩარჩოებში - სასამართლოსა და აქციებში. პანკისელების განწყობაა, რომ ეს გადაცდომა არ უნდა შერჩეთ, საქმე შეიძლება, ადამიანის უფლებათა ევროპულ სასამართლოშიც წავიდეს, რომ მომავალში საწოლში არ ესროლონ ახალგაზრდა ბიჭს. მთელი ხეობა ამ ერთი აზრის გარშემოა გაერთიანებული, რომ ობიექტურად გაირკვეს მომხდარი და ის, თუ რატომ ესროლეს ახალგაზრდას“ - აღნიშნა ბორძიკაშვილმა.

მისივე ინფორმაციით, ჩატარებულ სპეცოპერაციასთან დაკაშირებით დღეს სოფელ დუისში 14:00-ზე, ხეობის მოსახლეობა შეიკრიბება

პანკისის ხეობაში უხუცესთა საბჭო უკვე იკრიბება, რომლის დასრულების შემდეგ საბჭო საგანგებო განცხადებას გააკეთებს.