"ძალიან მძიმეა ეს დანაკარგი"- პრემიერი კოტე ზალდასტანიშვილის გარდაცვალებას ეხმაურება

პოლიტიკა - 11:19, 27 Dec, 2017

1032

საქართველოს პრემიერ-მინისტრი ავსტრიაში საქართველოს ელჩის გარდაცვალებას მთავრობის სხდომაზე გამოეხმაურა. გიორგი კვირიკაშვილმა კოტე ზალდასტანიშვილის დამსახურებაზე ისაუბრა, მისი თქმით ის ქართული დიპლომატიის ერთ-ერთი ყველაზე თვალსაჩინო წარმომადგენელი იყო და მისი გარდაცვალება ძალიან მძიმე დანაკარგია:

„მთავრობის სხდომა მინდა დავიწყო იმ ადამიანზე საუბრით, რომელიც ყველა ჩვენგანისთვის და ბევრისთვის ამ დარბაზში ახლო მეგობარიც იყო - ძალიან ღირსეულ ადამიანზე, კოტე ზალდასტანიშვილზე.

ძალიან მიჭირს მასზე წარსულ დროში საუბარი, სულ რამდენიმე დღის წინ მქონდა მასთან ბოლო კომუნიკაცია.

იგი იყო მართლაც გამორჩეული ქართველი, ჩვენი მეგობარი, ჩვენი დიპლომატიის ერთ-ერთი ყველაზე თვალსაჩინო წარმომადგენელი და ადამიანი, რომელიც ყველას გვეამაყებოდა. ძალიან მძიმეა ეს დანაკარგი.

მე პირადად მისგან, იმ მოკლე პერიოდში, როდესაც ვიყავი საგარეო საქმეთა მინისტრი, ძალიან ბევრი რამ ვისწავლე და სასარგებლო რჩევა მივიღე. მას განსაკუთრებით უხაროდა, როდესაც სხვებს უზიარებდა თავის ძალიან მდიდარ გამოცდილებას. იგი იყო ყოველთვის იქ, სადაც საქართველოსთვის იყო ძალიან მნიშვნელოვანი და ყოველთვის გამორჩეულად იცავდა ჩვენი ქვეყნის ინტერესებს. ძალიან მძიმე დანაკლისია ჩემთვის პირადად და ვიცი, რომ ყველა ჩვენგანისთვის.“- განაცხადა გიორგი კვირიკაშვილმა.