სპეცოპერაცია ბერი გაბრიელ სალოსის ქუჩაზე - საზოგადოებაში არსებულ კითხვებზე, ჯერჯერობით პასუხი არ ისმის, ამის პარალელურად, დღეს ჩატარდა ახალი სპეცოპერაცია. სახელმწიფო უსაფრთხოების სამსახურის ცნობით, დაკავებულია 5 პირი, რომლებიც სწორედ ბერი გაბრიელ სალოსის ქუჩაზე ჩატარებულ სპეცოპერაციასთან და ტერორიზმთან არიან კავშირში.

საკითხის შესაფასებლად „ნიუპოსტი“ საქართველოს თავდაცვის ყოფილ მინისტრს დიმიტრი შაშკინს დაუკავშირდა, რომელიც აცხადებს, რომ საზოგადოება ითხოვს კითხვებზე პასუხს და არა პიარაქციებს ძალოვანი სტრუქტურების მხრიდან, პასუხები კი საჭიროა იმისათვის, რომ მოქალაქეებმა თავი უსაფრთხოდ იგრძნონ:

„სამწუხაროდ, ბოლო პერიოდში ჩვენი ძალოვნების მიერ გადადგმული ნაბიჯები უფრო ბევრ შეკითხვას ბადებს, ვიდრე პასუხები არსებობს, ეს არის ძალიან სამწუხარო რეალობა, სიღრმისეული პრობლემა, რომელიც როგორც ჩანს ჩვენს ქვეყანას გააჩნია, ეს არის უსაფრთხოების პრობლემა, ჩვენი ხელისუფლება ამას პასუხობს რაღაც პიარაქციებით, დაშინების აქციებით, რომელიც არ აგვარებს პრობლემას, არამედ აქვს პოტენციალი, რომ ეს პრობლემა უფრო გაამწვავოს.

პანკისი არის საკმაოდ ფაქიზი თემა, იქ ცხოვრობს ხალხი, რომელმაც საკუთარ თავზე განიცადა თუ რა არის რუსული გენოციდი, ის, რაც რუსეთის ფედერაციამ ჩეჩნეთში გააკეთა, ამას საერთაშორისო თანამეგობრობა ეძახის გენოციდს, ამოხოცეს ხალხი და ასეთი მეთოდით დაამყარეს მოჩვენებითი სიმშვიდე. ამ ხალხს ძალიან კარგად ესმის, რომ რუსეთი მუდმივ რეჟიმში ცდილობს პროვოკაციების მოწყობას პანკისში, 2000-იანების დასაწყისში, რუსეთი საქართველოსგან მუდმივად ითხოვდა იქ ანტიტერორისტული ცენტრის გახსნას, რაც იქნებოდა ძალიან დიდი დარტყმა ჩვენი დამოუკიდებლობისა და უსაფრთხოებისთვის. სააკაშვილის მთავრობამ პანკისის პრობლემა მოაგვარა, ნდობის აღდგენით და ჩამოყალიბებით, ისინი საკმაოდ დიდი ეჭვით უყურებენ ნებისმიერ სახელმწიფო მოქმედებებს ამ რეგიონში. ამ ხალხთან დიალოგი შესაძლებელია, ნდობის საშუალებით შესაძლებელია ყველა პრობლემის მოგვარება, რაც ჩვენმა მთავრობამ გააკეთა და აჩვენა მსოფლიოს, რომ შესაძლებელია ძალოვნების პიარაქციების გარეშე, დაშინების გარეშე, მათთან ნორმალური ურთიერთობის ჩამოყალიბება.

რაც მოხდა თბილისში, საზოგადოების შეკითხვა არის ძალიან მარტივი. როგორ შემოვიდა ეს ხალხი საქართველოში? გასაგებია, რომ ისინი არალეგალურად შემოვიდნენ, ჩატაევი საკუთარი პასპორტით ვერ შემოვიდოდა, რადგან იძებნებოდა სამი ქვეყნის მიერ, ის, რომ მას ვიღაც ეხმარებოდა, ესეც გასაგებია. ის, რომ ამ ადამიანს ვიღაც მფარველობდა, როდესაც აქ ცხოვრობდა, ესეც გასაგებია, ამ შეკითხვებზე ელოდება პასუხს. ამდენი იარაღი როგორ შემოიტანეს ქალაქის ცენტრში? როგორ გადალახეს საზღვარი? ამ პასუხებს ითხოვს იმისათვის, რომ დარწმუნდეს, არის უსაფრთხოდ. არავინ სხვა ისე არ გამოიყენებს ამ დერეფანს, როგორც გამოიყენა ჩატაევმა. საზოგადოება არ ითხოვს პიარაქციებს, რომელიც წამიერ ეფექტს გაძლევს, მაგრამ ქმნის უფრო დიდ პრობლემას. თუ ამას არ მოჰყვა ნდობაზე აგებული მუშაობა ამ რეგიონში, მაქვს სუბიექტური მოსაზრება, რომ სიტუაცია ვერ გამოსწორდება და შეიქმნება ახალი პრობლემები“, - აცხადებს დიმიტრი შაშკინი.