ბერი გაბრიელ სალოსის ქუცაზე ჩატარებული სპეცოპერაცია - დღეს ჩატარებული სპეცოპერაციის შედეგად დანაშაულტან კავშირში მყოფი კიდევ 5 პირი დააკავეს. მომხდარს ეხმაურება საქართველოს პარლამენტის თავდაცვისა და უსაფრთხოების კომიტეტის თავმჯდომარე ირაკლი სესიაშვილი:

„ჩვენ ყველა საკითხი ნდობის ჯგუფის ფორმატში განვიხილეთ, დაახლოებით სამი კვირის წინ ჯგუფი შეიკრიბა სწორედ ამ საკითხზე სამსჯელოდ, ჩვენ შეძლებისდაგვარად სახელმწიფო უსაფრთხოების სამსახურმა წარმოგვიდგინა ყველა შესაბამისი მტკიცებულება, რისი ჩვენების და მოწოდების საშუალებაც ჰქონდა, ყველა იმ დეტალის შესახებ, რომელიც დღეს ოფიციალურად გაჟღერდა, ინფორმაცია მივიღეთ. რაც შეეხება საზღვარს, საზღვარი მარტივი საკონტროლებელი ნამდვილად არ არის, ეს ჩვეულებრივი პრაქტიაა, რომ ე.წ. მწვანე ზოლი არსებობს მთელს მსოფლიოში, მომავალი წლის ბიუჯეტში, ჩვენ უკვე გავითვალისწინეთ საზღვრის დაცვის კუთხით გაუმჯობესების საბიუჯეტო საკითხები, ასე რომ ამ მიმართულებით, ჩვენ აუცილებლად გადავდგამთ სერიოზულ ნაბიჯებს, რაც არ უნდა ბევრი თანხა ჩავდოთ საზღვარში, ყოველთვის იარსებებს გარკვეული ხვრელები.

ფაქტია, რომ ძალიან სერიოზულად იმუშავა გამოძიებამ, იქ იყო მთელი რიგი რისკები, რომ გამოძიებას გაუჭირდებოდა ფაქტის დადასტურება, იყო კომპიუტერი, ძალიან დაზიანებული, მადლობა ჩვენს ამერიკელ პარტნიორებს. იყო ზოგადად ინფორმაცია იმ პირების შესახებაც, ვინც მათ დახმარებას უწევდა.

რა თქმა უნდა, სამწუხარო ფაქტია, როდესაც 19 წლის ახალგაზრდა დაჭრილია, ასევე სამწუხარო ფაქტია ისიც, თუ დადასტურდება, რომ ამ ახალგაზრდას რაიმე კავშირი ჰქონდა ტერორიზმთან. გამოძიება უნდა ჩატარდეს და გავიგოთ, რამდენად ადექვატურად მოქმედებდა სპეცრაზმი. ეს იყო ორგანიზებული დანაშაული და მხოლოდ საქართველოში მცხოვრებნი არ იყვნენ ჩართულნი, ახლა გამოძიების იმ ნაწილზე ვმუშაობთ, რომელიც შეეხება საქართველოს, სხვა ნაწილს რაც შეეხება, გამოძიებაში ჩვენი პარტნიორებიც არიან ჩართულნი და ის ქვეყნებიც, რომლებიც შესაძლოა საფრთხის ქვეშ დამდგარიყვნენ. განვაგრძობთ გამოძიებას, მათ შორის სხვა პირების შესაძლო თანამონაწილეების შესახებ“, - განაცხადა ირაკლი სესიაშვილმა.