სპეცოპერაცია პანკისში, ვინ შემოიყვანა აჰმედ ჩატაევი საქართველოში

სპეცოპერაცია პანკისში, ვინ შემოიყვანა აჰმედ ჩატაევი საქართველოში - სუსი დეტალებზე საუბრობს

პოლიტიკა - 12:02, 26 Dec, 2017

4380

სუს-მა ტერორიზმის დაფინანსების , ტერორისტული საქმიანობის სხვაგვარი მატერიალური მხარდაჭერის და რესურსებით უზრუნველყოფის ბრალდებით პანკისის ხეობში ჩატარებული სპეცოპერაციისას 5 პირი დააკავა, რომლებიც დაკავშირებული არიან თბილისში გაბრიელ სალოსის ქუჩაზე ჩატარებული სპეცოპერაციისას ლიკვიდირებულ პირებთან, ინფორმაცია ამის შესახებ საქართველოს სახელმწიფო უსაფრთხოების სამსახურმა დღეს საგანგებო ბრიფინგზე გაავრცელა.
სუს-ის ინფორმაციით დაკავებულებმა აჰმედ ჩატაევს საქართველოში ჩამოსვლისა და დაბინავებისას დახმარება გაუწიეს.

"პანკისის ხეობაში სპეცოპერაციისას დაკავებული პირები დაკავშირებულნი არიან 21-22 ნოემბერს ბერი გაბრიელ სალოსის ქუჩაზეც ჩატარებული სპეცოპერაციის შედეგად განეიტრალებული პირებთან და წარმოადგენენ მათ ხელშემწყობ პირებს. ტემერლან მაჩალიკაშვილი შეეცადა წინააღმდეგობა გაეწია სამართალდამცავებისათვის, ეცადა მოქმედებაში მოეყვანა ხელყუმბარა, სამართალდამცავების მხრიდან უკიდურესი აუცილებლობიდან გამომდინარე გამოყენებული იქნა პროპორციული ძალა და მოხდა ტემირლამ მაჩალიკაშვილის მისამართით გასროლა, რის შედეგადაც ის თავის არეში დაიჭრა და ის ჰოსპიტალიზირებულია.

გამოძიების ამ ეტაპზე დადგენილია, რომ ამ პირებმა უზრუნველყვეს აჰმედ ჩატაევის და მისი თანამზრახველების ჯერ თურქეთის ტერიტორიაზე ტრანსპორტირება, მათი დროებითი საცხოვრებელი მისამართიდან საქართველოს საზღვრის კირნათი-მარადიდის მწვანე ზოლის მონაკვეთამდე, ხოლო შემდეგ დაეხმარნენ ამავე მონაკვეთით საქართველოში შემოსვლაში. დაკავებულმა პირებმა ასევე უზრუნველყვეს დანაშაულებრივი ჯგუფის წევრების თბილისამდე ჩამოყვანა, დახმარება გაუწიეს ბინის ქირაობასა და იარაღის მოძიებაში."- განაცხადა სუს-ის საზოგადოებასთან ურთიერთობის სამსახურის ხელმძღვანელმა ნინო გიორგობიანმა დღეს გამართულ საგანგებო ბრიფინგზე.