,,აშშ-ის მკაცრი გაფრთხილება ეხება პირადად ივანიშვილს და მის კორუმპირებულ მთავრობას, ახლა ჯერი ხალხზეა“ - ნუგზარ წიკლაური აშშ-ის კონგრესის შესაძლო სანქციებზე

პოლიტიკა - 18:40, 23 Dec, 2017

6014

აშშ-ის კონგრესის მხრიდან შესაძლო სანქციებს ეხმაურება ნაციონალური მოძრაობის წევრი ნუგზარ წიკლაური, რომელიც აცხადებს, რომ ეს მკაცრი გაფრთხილება ეხება არა საქართველოს, არამედ პირადა ივანიშვილს მის მთავრობას.

,,აშშ კონგრესის შესაძლო სანქციები პირდაპირ უკავშირდება ოლიგარქი ივანიშვილის დესტრუქციულ როლს ქვეყნის დემოკრატიულ განვითარებაში.

არაერთი გაფრთხილების მიუხედავად, ავტორიტარული მისწრაფებების მქონე ივანიშვილმა განაგრძო პოლიტიკური ცხოვრების არაფორმალური მართვა, რაც დამღუპველია საქართველოსთვის და მიუღებელი ჩვენი ქვეყნის სტრატეგიული პარტნიორებისთვის.

დღეს ივანიშვილი არის პარლამენტი და მთავრობა; ის იღებს საბოლოო გადაწყვეტილებებს საქართველოს პოლიტიკურ, სამხედრო, ინსტიტუციონალურ, სოციალურ და ეკონომიკურ საკითხებზე.

დღეს ივანიშვილი არის პროკურატურაც და სასამართლოც და ის წყვეტს, ვინ და რამდენი ხნით უნდა ჩაჯდეს ციხეში; ვინ და რა პირობებში უნდა მოიხადოს სასჯელი.

გამოუძიებელი მკვლელობები, ადამიანთა გატაცება, ოპონენტებზე ფიზიკური თავდასხმები, თავისუფალ სიტყვაზე შეტევა, სახელმწიფო სისტემის სრული გახრწნა, კორუფცია და მომხვეჭელობა უკავშირდება უშუალოდ დიქტატორ ივანიშვილს, როგორც დანაშაულებრივი რეჟიმის შემოქმედს და მმართველს.

ამერიკის შეერთებული შტატები არის საქართველოს უპირველესი პარტნიორი და სახელმწიფო დამოუკიდებლობის მტკიცე დამცველი. ამ ქვეყანამ უდიდესი როლი ითამაშა რუსული აგრესიის შეჩერებაში და დღესაც აძლიერებს საქართველოს შეიარაღებულ ძალებს. ამავე დროს, ამერიკა არის საქართველოს დემოკრატიული მომავლის პრინციპული და საიმედო მხარდამჭერი, რაც დიქტატურის დამყარების მცდელობის აღკვეთაში დახმარებასაც გულისხმობს.

აშკარაა, რომ ჩვენი ქვეყნის მეგობრები ხედავენ პოლიტიკური დევნის და კორუფციის შეუწყნარებელ ფაქტებს, რაც ივანიშვილის მთავრობამ ჩაიდინა და ეს მკაცრი გაფრთხილება ეხება არა საქართველოს, არამედ პირადად ივანიშვილს და მის კორუმპირებულ მთავრობას.

ახლა ჯერი ქართველ ხალხზეა: ხალხმა უნდა მიიღოს საბოლოო ვერდიქტი, რათა ავკაცმა დიქტატორმა პასუხი აგოს და საქართველოს პოლიტიკური ისტორიის კუთვნილება გახდეს“ - წერს ნუგზარ წიკლაური ფეისბუქის საკუთარ გვერდზე.