რუსთავის მერმა რუსთაველი სტუდენტების შეღავათიანი პირობებით მგზავრობის საკითხთან დაკავშირებით ახალგაზრდებთან სამუშაო შეხვედრა გამართა

პოლიტიკა - 18:30, 23 Dec, 2017

1180

რუსთავის მერია დედაქალაქის მიმართულებით სტუდეტების შეღავათიანი პირობებით მგზავრობასთან დაკავშირებულ პროექტზე მუშაობას იწყებს. ამ საკითხთან დაკავშირებით, დღეს, რუსთავის მერმა ირაკლი ტაბაღუამ და საკრებულოს თავმჯდომარემ ლევან ონიანმა რუსთაველ ახალგაზრდებთან სამუშაო შეხვედრა გამართეს. შეხვედრას ასევე, საკრებულოს წევრები – ამირან ჯანჯღავა, გიორგი ჯღარკავა და გიორგი ჭანტურია ესწრებოდნენ.

რუსთავის მერმა და საკრებულოს თავმჯდომარემ რუსთაველ ახალგაზრდებთან ერთად, პროექტის განხორციელების გზები განიხილეს და მათთან ერთად იმ სტუდენტთა შერჩევის კრიტერიუმებზე იმსჯელეს, რომლებიც საწყის ეტაპზე, პროგრამის ბენეფიციარებად განისაზღვრებიან. ქალაქის მერმა სტუდენტებს რამდენიმე მოდელი შესთავაზა, რომლის მიხედვითაც სტუდენტები რუსთავიდან თბილისის მიმართულებით და პირიქით, შეღავათიანი ტარიფით იმგზავრებენ.

ადგილობრივი ხელისუფლების წევრები სტუდენტების მოსაზრებებით დაინტერესდნენ და პროგრამის ეფექტური დაგეგმვის მიზნით, წინადადებების წარდგენა და პროცესში აქტიური ჩართულობა შესთავაზეს.

როგორც ქალაქის მერმა აღნიშნა, დედაქალაქის მიმართულებით სტუდენტების შეღავათიანი პირობებით მგზავრობასთან დაკავშირებულ საკითხზე ერთობლივი მუშაობა გაგრძელდება და საბოლოო პირობები მათთან აქტიური კონსულტაციების გზით შემუშავდება.

შეხვედრის დაწყებამდე, ხელისუფლების წარმომადგენლებმა და ახალგაზრდებნა წუთიერი დუმილით პატივი მიაგეს 19 დეკემბერს, რუსთავში მომხდარი ხანძრის შედეგად გარდაცვლილთა ხსოვნას.