,,ბაგა-ბაღების დაფინანსების პრობლემა ამ მთავრობამ შექმნა“ - რატომ გააუქმა 2013 წელს მთავრობამ ვაუჩერული დაფინანსების რეფორმა

პოლიტიკა - 14:50, 22 Dec, 2017

1807

პრემიერ-მინისტრმა გიორგი კვირიკაშვილმა პარლამენტის რიგგარეშე სხდომაზე ბაღების კორექტყირებაზე ისაუბრა და განაცხადა, რომ ოჯახებმა, რომლებსაც შესაძლებლობა გააჩნიათ, ბაღის გადასახადი უნდა გადაიხადონ, რაც მისი თქმით, სამართლიანი მიდგომაა.

„ნიუპოსტი“ პრემიერის ამ ინიციატივის შესაფასებლად, განათლების და მეცნიერების ყოფილ მინისტრს დიმიტრი შაშკინს დაუკავშირდა. როგორც შაშკინმა ჩვენთან საუბარში აღნიშნა, ხელისუფლებას 2013 წელს მზად ჰქონდა მიხეილ სააკაშვილის მთავრობის მიერ დატესტილი რეფორმა საბავშვო-ბაღების ვაუჩერულ დაფინანსებასთან დაკავშირებით, მაგრამ მათ ეს გაუქმეს.

„საბავშვო-ბაღების დაფინანსების პრობლემა არის შექმნილი ამ მთავრობის მიერ და ეს არის რეალობა. მიხეილ სააკაშვილის მთავრობას ჰქონდა ძალიან კარგად და სწორად გაწერილი და დატესტილი რეფორმა, რომელიც ეხებოდა საბავშვო-ბაღების ვაუჩერულ დაფინანსებას, რაც ნიშნავს იმას, რომ ყველა ბავშვი იღებდა ვაუჩერს, რომელიც ჭირდებოდა და თვითონ აირჩევდნენ კერძო ბაღში შევიდოდნენ თუ საჯაროში. ამ რეფორმის ფუნდამენტი იყო წარმატებული სასკოლო ვაუჩერული დაფინანსების რეფორმა, რომელმაც წახალისება მისცა კერძო სკოლების განვითარებას, იმიტომ რომ სახელმწიფო აფინანსებს ბავშვების სწავლას როგორც კერძო სკოლებში ასევე საჯარო სკოლებში. რეფორმა იყო მზად და უნდა დაწყებულიყო 2013 წელს მაგრამ გააუქმეს. ამის შემდეგ შექმნეს სისტემა, რომელიც გვაძლევს თანხების უზარმაზარ დეფიციტს საბავშვო-ბაღების დაფინანსებისთვის. ამ სიტუაციაში არსებობს ორი პრობლემა - ერთი ის, რომ 5 წლის ასაკის ბავშვებს აუკრძალეს სკოლაში შესვლა, რის გამოც 20 ათასმა ბავშვმა ისევ საბავშვო ბაღს მიმართა და მეორე - ვაუჩერული რეფორმის შეჩერება“- განაცხდა შაშკინმა.

მისი თქმით, პრემიერის ინიციატივა ვერ იმუშავებს, რადგან საქართველოში ძალიან მცირე მაჩვენებელია შეძლებული ოჯახების და ეს მიუთითებს იმაზე, რომ სახელმწიფო პრობლემას სიღრმისეულად ვერ ხედავს.

„რასაც გვთავაზობს პრემიერი უბრალოდ ვერ იმუშავებს ძალიან მარტივი მიზიზის გამო. შეძლებული ოჯახების საქართელოში იმდენად მცირეა ეს პროგრამა ვერ მოგვცემს განსხვავებას. შეძლებული ოჯახები ისედაც არ დადიან სახელმწიფო ბაღებში მათ ყავთ ან ძიძები ან დადიან კერძო ძვირადღირებულ ბაღებში. კვირიკაშვილის განცხადება კი მიუთითებს იმაზე, რომ სახელმწიფო სიღრმისეულად ვერ ხედავს პრობლემას. ჩემი ნათქვამი, რომ არ იყოს მხოლოდ სიტყვები უნდა ვილაპარაკო ფაქტებით, ყველას შეუძლია ამოიღოს სტატისტიკა იმის შესახებ თუ რამდენი ადამიანი იხდის ქონების გადასახადს და რამდენი ადამიანის ქონება ითვლის 50 000 ლარს და დაინახავთ რამდენად მცირეა ეს მაჩვენებელი“ - აღნიშნა დიმიტრი შაშკინმა.