ნიუ იორკში გაეროს გენერალური ასამბლეის რიგგარეშე სხდომაზე 129 ქვეყანამ მხარი დაუჭირა რეზოლუციის პროექტს, რომელიც იერუსალიმის ისრაელის დედაქალაქად აღიარების შესახებ დონალდ ტრამპის გადაწყვეტილების გაუქმებას ითვალისწინებს.

წინააღმდეგი იყო 9 ქვეყანა, 35-მა კი თავი შეიკავა. საქართველოს კენჭისყრაში მონაწილეობა საერთოდ არ მიუღია.

„ჩვენ როგორც ვნახეთ, შედეგების შესაბამისად, საკმაოდ გაიყო პოზიციები. 36-მა ქვეყანამ თავი შეიკავა, მათ შორის ევროკავშირის წევრმა ქვეყნებმა. ევროკავშირის პოზიციაც არ იყო ერთიანი. ჩვენ არ გვქონდა ამ საკითხზე კონსულტაციები პარტნიორებთან და საკითხის სენსიტიურობიდან გამომდინარე, ჩვენმა დელეგაციამ არ მიიღო განხილვებში მონაწილეობა, შესაბამისად კენჭისყრაშიც,“ - განაცხადა საგარეო საქმეთა მინისტრმა მიხეილ ჯანელიძემ.