პარლამენტში გიორგი კვირიკაშვილსა და ნიკა მელიას შორის მომხდარი დაპირისპირება - პრემიერ-მინისტრობის კანდიდატის მხრიდან შეურაცხმყოფელ ფრაზებსა და ქცევას თავად ნიკა მელია „TV პირველის“ პირდაპირ ეთერში გამოეხმაურა. მელიას განცხადებით დემოკრატიულ ქვეყანაში, მსგავსი ინციდენტის შემდეგ პრემიერ-მინისტრი გადადგებოდა:

“დღეს პარლამენტში დამხვდა მთელი „ქართული ოცნება“, მინისტრთა კაბინეტის შემადგენლობით, რომლებსაც აქვთ ერთი გზავნილი, რა მოხდა გუშინ? როდესაც უსვამენ ამ კითხვას ჟურნალისტები მათ, პასუხი არის ის, რომ პრემიერ-მინისტრმა დაიცვა საკუთარი ღირსება, თავად პრემიერ-მინისტრმაც განაცხადა ეს, მე რომ მკითხოთ, დღეს უფრო მძიმეა ვითარება, ვიდრე გუშინ იყო ბატონი კვირიკაშვილის მდგომარეობა, ის, რასაც დღეს საუბრობენ და ცდილობენ გაამართლონ ქვეყნის მმართველის ქმედება, იმ ფონზე, როდესაც უმწვავესი და ძალიან საჭირბოროტო კითხვები ისმებოდა, როგორც ჩანს მუშტი-კრივზეც არ იტყოდა უარს, დაავიწყდა, არა მხოლოდ გუშინ, რომ იგი არის პრემიერ-მინისტრი, ნორმალურ, დემოკრატიულ ქვეყანაში დღეს აქ, პარლამენტში პრემიერ-მინისტრობის კანდიდატი ბატონი კვირიკაშვილი აღარ მოვიდოდა, დაწერდა განცხადებას და წავიდოდა სახლში“, - განაცხადა მელიამ.

მან ასევე გაიხსენა ფაქტები, რამაც კონფლიქტი წარმოქმნა:

„იგი საუბრობდა იმ სისტემაზე, რომელიც უკავშირდებოდა მანდატურის ინსტიტუტს და დაგმო ის სამსახური, დაადანაშაულა წინა ხელისუფლება, ამას მოჰყვა ჩემი რეპლიკა. დღე არ გავა, რომ გახმაურებული მკვლელობა არ მოხდეს. თუ ჩვენ რამე განგვასხვავებს „ართული ოცნებისგან“ სწორედ არის ზნეობა და მორალი, ეს არის ის გუნდი, რომელმაც „ნაციონალურ მოძრაობას“ დასდო ბრალი ჩვილი ბავშვის მკვლელობაში, რაფალიანცს ვგულისხმობ“, - აღნიშნა „ნაციონალური მოძრაობის“ პოლიტიკური საბჭოს თავმჯდომარემ.