საქართველოს შინაგან საქმეთა მინისტრობის კანდიდატი გიორგი გახარია მანდატურის ინსტიტუტზე კომენტარს აკეთებს. პარლამენტის რიგგარეშე სხდომაზე გახარიამ აღნიშნა, რომ სკოლებში მანდატურების იმ სახით დაბრუნება, როგორიც იყო არ მოხდება, საპატრულო პოლიციას კი „სკოლებში არაფერი ესაქმება“:

„მანდატურების ეფექტურობის გაზრდის მიმართულებით წამოწყებულმა ინიციატივებმა გაურკვეველი სპეკულაციები გამოიწვია. პირველი - არავინ აბრუნებს მანდატურებს ისეთი სახით, როგორიც იყო; მეორე - არაფერი ესაქმება საპატრულო პოლიციას სკოლაში; მესამე - რეალურად ყველაზე მნიშვნელოვანი გახლავთ ის, რომ უწყებათაშორის კომისიაში ფაქტობრივად უკვე ჩამოყალიბებული აქვს ის ნაბიჯები, რომელიც აუცილებელია, რომ გაიზარდოს მანდატურების ეფექტურობის ხარისხი და უახლოეს პერიოდში იქნება პარლამენტში წარმოდგენილი. აქ ყველაზე მნიშვნელოვანი გახლავთ მათი დაქვემდებარებულობის საკითხი. მანდატური არ უნდა ექვემდებარებოდეს სკოლის დირექტორს, უბრალოდ ინტერესთა კონფლიქტია. ამასთან, დღევანდელი კანონდებლობით მანდატური შეუძლია გახდეს საშუალო განათლების მქონე ახალგაზრდა 20 წლიდან, რაც უბრალოდ არალოგიკურია, ამიტომ მსგავსი ტექნიკური ჩასწორებები ბევრი იქნება“, - განაცხადა გახარიამ.