პრეზიდენტის მრჩეველი პოლიტიკურ საკითხებში ფიქრია ჩიხრაძე აცხადებს, რომ საჯარო პირები ვალდებულნი არიან საზოგადოებაში მოჭარბებული აგრესიის შემცირებას შეუწყონ ხელი. აღნიშნული კომენტარით ჩიხრაძე გუშინ გიორგი კვირიკაშვილსა და ნიკა მელიას შორის მომხდარ დაპირისპირებას გამოეხმაურა:

"ჩვენ ყველანი შეწუხებული ვართ ამ ფაქტით. ერთი რამ, რაც მინდა ვთქვა და რაზედაც განსაკუთრებით ბოლო პერიოდში ჩვენ ვლაპარაკობთ, ეს არის ქართულ საზოგადოებაში მოჭარბებული აგრესია. ყველა ის ადამიანი, ვისაც შეხება გვაქვს მეტ-ნაკლებად საჯარო სივრცესთან, ვალდებული ვართ, რომ ეს გავითვალისწინოთ, ამას ანგარიში გავუწიოთ და პირიქით, ვიზრუნოთ და ნაბიჯები გადავდგათ იმისკენ, რომ იყოს საგნობრივი დიალოგი და მოვიქცეთ ისე, რომ ამ აგრესიის შემცირებას შევუწყოთ ხელი. ეს პასუხისმგებლობა გააჩნია თითოეულ საჯარო პირს", - განაცხადა ფიქრია ჩიხრაძემ.