საქართველოს პრემიერ-მინისტრი გიორგი კვირიკაშვილი ჟენევის დისკუსიების ფორმატზე საუბრისას აცხადებს, რომ აღნიშნული ფორმატის მინისტრის დონეზე ამაღლებისა და მასში პირადად ჩართვის მომხრეა, კვირიკაშვილი ამისთვის მზადყოფნას გამოთქვამს. ამის შესახებ მან ფრაქცია „საქართველოს პატრიოტებთან“ შეხვედრაზე განაცხადა:

„მოგეხსენებათ, რომ არაერთი მოლაპარაკება, მათ შორის, 90-იან წლებში, ბოლო პერიოდშიც ფუჭი აღმოჩნდა და სამწუხაროდ, არ შესრულდა ვალდებულებები რუსეთის მხრიდან. ამიტომ კიდევ ერთხელ რომ არ აღმოვჩნდეთ ასეთ სიტუაციაში, ჩვენ ძალიან აქტიურად ვმუშაობთ და კიდევ ერთხელ ვამბობ, ყველაფრის გასაჯაროება, ალბათ, რთული იქნება, ჩვენს სტრატეგიულ პარტნიორებთან, რათა არსებული ჟენევის დისკუსების ფორმატის ფარგლებში პირველ რიგში, ავწიოთ დონე და მინისტრის მოადგილის დონიდან გადავიდეთ მინიმუმ მინისტრის დონეზე და მე მზად ვარ, რომ პრემიერ-მინისტრის დონეზეც გადავიდეთ და პირადად ჩავერთვები აუცილებლად ამ ფორმატის საქმიანობაში. გარდა ამისა, ჩვენი მოთხოვნა და თხოვნაცაა ჩვენი სტრატეგიული პარტნიორების მიმართ, რომ ცეცხლის შეწყვეტის ხელშეკრულების მანდატიდან გავფართოვდეთ და კონფლიქტის პოლიტიკური გადაწყვეტის ფორმატის ფუნქციაც და მანდატიც მივანიჭოთ ამ ფორმატს. იმედი მაქვს, რომ ამ მიმართულებით შესაძლებელია, განხორციელდეს გარკვეული ძვრები, თუმცა, რუსეთის ქმედებები დღეს ამის იმედს არ იძლევა, მაგრამ მაინც ვფიქრობ, რომ ჩვენი მხრიდან უნდა იყოს კონსტრუქციული მიდგომა და ჩვენ ამ კონსტრუქციულ მიდგომას ნაბიჯ-ნაბიჯ ვახორციელებთ“, - განაცხადა კვირიკაშვილმა.