"შს მინისტრის მოადგილის სამომავლო ხედვებზე და გეგმებზე დიდ იმედებს ვამყარებ"- თეა წულუკიანი

პოლიტიკა - 20:18, 18 Dec, 2017

1324

სისხლის სამართლის სისტემის რეფორმის უწყებათაშორის საკოორდინაციო საბჭოს რიგით 25-ე სხდომის დასრულების შემდეგ იუსტიციის მინისტრმა შეხვედრის მნიშვნელობაზე ისაუბრა.

თეა წულუკიანმა კმაყოფილება გამოთქვა, რომ შს სამინისტრო ახალი ხედვით წარსდგა თუ როგორ უნდა წარიმართოს პროგრესულად სისხლის სამართლის რეფორმა.

მინისტრი შს მინისტრი ნათია მეზვრიშვილის შს მინისტრის მოადგილედ დანიშვნას მიესალმება:

"ჩვენ დღეს ძალიან ნაყოფიერი და საინტერესო საბჭოს სხდომა ჩავატარეთ, რომელიც ევროკავშირის მხარდაჭერით წლებია უკვე მუშაობს სისხლის სამართლის სისტემის რეფორმის საკითხზე საქართველოში. ეს ის საბჭოა, რომლის ეგიდითაც - მაგალითად ბავშვთა უფლებების თემაზე, დაზარალებულის უფლებების თემაზე, ადვოკატების პროკურორების და სხვათა როლის დაბალანსების/გაძლიერების თემაზე არაერთი რეფორმა შემუშავდა. მე როგორც საბჭოს თავმჯდომარეს ძალიან მიხარია, როდესაც ვხედავ, რომ შინაგან საქმეთა სამინისტროს ახალი გუნდი წარსდგა ახალი ხედვებით, იმასთან დაკავშირებით თუ როგორ უნდა წარიმართოს მათი სისტემის ფარგლებში კიდევ უფრო სწორად და ახლებურად, პროგრესულად სისხლის სამართლის რეფორმა და ამიტომაც, ყველანი იმედით და პერსპექტივებით აღვსილნი ვუყურებთ იმას, რომ მაგალითად ბავშვების თემებზე 14 წლამდე ასაკის ბავშვების მიერ ჩადენილ დანაშაულებზე ჩვენ შევძლებთ ძალიან აქტიური და წარმატებული სამუშაო გავწიოთ უწყებებს შორის. ჩვენ ვხედავთ, რომ მინისტრის მოადგილე დაინიშნა ქალი მოადგილე- ნათია მეზვრიშვილი, რომლის სამომავლო ხედვებზე და გეგმებზე მე პირადად დიდ იმედებს ვამყარებ, რომ ჩვენ ერთად გვიმუშავია იუსტიციის სისტემის ფარგლებში და ამით ჩვენ შინაგან საქმეთა სამინისტროში რეალური მოკავშირე გაგვიჩნდა სისხლის სამართლის რეფორმების დარგში"- განაცხადა მინისტრმა.