„მაუწყებლის შესახებ“ კანონი - პარლამენტის ვიცე-სპიკერის თამარ ჩუგოშვილის განცხადებით, თუ პრეზიდენტი აღნიშნულ კანონპროექტს ვეტოს დაადებს, უმაღლესი საკანონმდებლო ორგანო გადაწყვეტილებას მოტივირებული შენიშვნებიდან გამომდინარე მიიღებს:

“თუ პრეზიდენტი ვეტოს დადების გადაწყვეტილებას მიიღებს, ეს იმას ნიშნავს, რომ კონკრეტულ შენიშვნებს გამოუგზავნის პარლამენტს. თუკი პრეზიდენტი ასეთ გადაწყვეტილებას მიიღებს, ჩვენ პირველ რიგში ამ შენიშვნებს ჩავხედავთ და თუ პარლამენტისთვის მისაღებია, არ არის გამორიცხული ეს შენიშვნები გავითვალისწინოთ.

მაუწყებლის კანონპროექტთან დაკავშირებით პარლამენტშიც ბევრი დისკუსია იყო. პირველ ვარიანტთან დაკავშირებით შენიშვნები გამოთქვეს და ბევრი რამეც შეიცვალა. არის საკითხები, რომელიც ბოლომდე, მათ შორის ჩვენი კოლეგების მხრიდანაც სახელდებოდა, როგორც პრობლემა. მათ შორის არის კომერციული რეკლამისა და სტარტაპების ნაწილი, მაგრამ რადგან მოლაპარაკებების დროს ბევრი შენიშვნა იყო გათვალისწინებული და კანონპროექტი თვისობრივად გადამუშავდა, ამიტომ პარლამენტმა თავისი პოზიცია გამოხატა და მხარი დაუჭირა. ახლა უკვე პრეზიდენტზეა დამოკიდებული, ის ხელს მოაწერს თუ არა კანონპროექტს,"- დასძინა პარლამენტის ვიცესპიკერმა.