საპარლამენტო უმრავლესობის წარმომადგენელი ეკა ბესელია აცხადებს, რომ უმრავლესობის შიგნით ორი ახალი ფრაქციის შექმნა აუცილებელი იყო. ამის შესახებ ბესელიამ კომენტარი ჟურნალისტებთან საუბრისას გააკეთა:

"ეს გადაწყვეტილება მომწიფდა, რომ უმრავლესობის შიგნით შეიქმნას დამატებით კიდევ ორი ფრაქცია. მე ვფიქრობ, ეს დროული გადაწყვეტილებაა, ვინაიდან მთავარი ფრაქცია "ქართული ოცნების" არის პრაქტიკულად ტოლფასი უმრავლესობის. რაოდენობრივად ის ძალიან დიდია, ამიტომ მართვის თვალსაზრისით და მათ შორის პოლიტიკურ პროცესებში ყველა წევრისთვის უფრო მეტი შესაძლებლობის მიცემისთვის და მეტად ჩართვისთვის, მე ვფიქრობ, გაცილებით უფრო მოქნილი იქნება კიდევ დამატებით ორი ახალი ფრაქციის შექმნა. ეს შესაძლებლობას მისცემს, ისეთ დიდ ფრაქციას, როგორიც დღეს "ქართული ოცნებაა" მოხდეს, როგორც პოლიტიკურ პროცესებში დეპუტატებისთვის უფრო მეტი ჩართვის შესაძლებლობის შექმნა, ასევე მართვის თვალსაზრისით გაცილებით უფრო მოქნილი პოლიტიკური ინსტრუმენტების გამოყენება. ამიტომ მე მგონია, ეს არის დროული და კარგი გადაწყვეტილება. ძალიან რთულია ასეთი დიდი ფრაქციის ისე მართვა, ისე რომ ყველას ქონდეს პოლიტიკურ პროცესში თანაბარი მონაწილეობის საშუალება", - განაცხადა ბესელიამ.

მისივე თქმით, ორი ახალი ფრაქციის შექმნის ინიციატორი პოლიტიკური გუნდია:

"პრემიერთან შესაძლოა ცალკეული საუბრები იყო, მაგრამ საბოლოო კონსულტაციები არ ყოფილა. რა თქმა უნდა, შეთანხმდება მასთან ეს ყველაფერი, ვინაიდან ის მმართველი პარტიის თავმჯდომარეა. ასეთი პოლიტიკური გადაწყვეტილებები პრემიერთან შეთანხმების გარეშე ბუნებრივია არ მიიღება", - განაცხადა დეპუტატმა.