საქართველოს მესამე პრეზიდენტის საქმე - მიხეილ სააკაშვილის დაკავება მსოფლიოს ყურადღების ცენტრში მოექცა, უკრაინის სასამართლომ კი მიიღო გადაწყვეტილება, რომელიც უკრაინის ოლიგარქი პრეზიდენტის სურვის ეწინააღმდეგებოდა, სასამართლომ სააკაშვილი გაათავისუფლა. ოდესის ყოფილი გუბერნატორის გვერდით კი ხალხი იდგა. საქართველოს თავდაცვის ყოფილი მინისტრის დიმიტრი შაშკინის განცხადებით, პოროშენკო ვერ ხვდება იმ ფაქტს, რომ მისი მთავარი პრობლემა სწორედ ხალხია და არა მიხეილ სააკაშვილი, რომელიც ხალხის გვერდით დგას:

„უკრაინაში ბრძოლა გადავიდა ფინალურ სტადიაზე, ყველა ხიდი არის დამწვარი, პრეზიდენტმა პოროშენკომ ყველა ის წითელი ხაზი გადალახა, რომლის გადალახვაც შესაძლებელი იყო. სახელმწიფო მონოლითი, რომლითაც ამაყობდა პოროშენკო, არის დანგრეული. ავაკოვი მაქსიმალურად ცდილობს, დაიკავოს ნეიტრალური პოზიცია, სასამართლომ მიიღო ის გადაწყვეტილება, რომელიც პოროშენკოს არ სურდა, უკრაინის ანტიკორუფციული ბიურო არის მუდმივ ჭიდაობაში პროკურატურასთან, ამ წუთისათვის პოროშენკო დარჩა სახელმწიფო უშიშროების სამსახურისა და პროკურატურის ამარად. როგორც ჩანს, უკვე აღარ არსებობს სახელმწიფო მონოლითი, უკრაინის ელიტაში არის სერიოზული ბზარები და ეს არის სააკაშვილის ბრძოლის შედეგი. პოროშენკომ დაუშვა ყველაზე დიდი შეცდომა, მან ჩათვალა, რომ მისი მთავარი პრობლემა არის მიხეილ სააკაშვილი. პოროშენკოს მთავარი პრობლემა კი არის ხალხი, ხალხი რომელსაც ძარცვავს. სააკაშვილი არის ადამიანი, რომელიც დგას ხალხთან, პროროშენკო კი ვერ იაზრებს, რომ მისი მთავარი პრობლემა არის ხალხი, რომელიც დაიღალა. მიხეილ სააკაშვილი არის პრობლემის ვიზუალიზაცია, პოროშენკო ვერ ხვდება, რომ ეს პირადული დაპირისპირება არ არის.

პოროშენკო არის მიჩვეული კონკრეტული მეთოდებით მუშაობას, ის არის მიჩვეული იმას, რომ ოპონენტი ან უნდა დააშინო, ან მოისყიდო, უკრაინის პოლიტიკა მიდის ამ გზით ბოლო 20 წლის განმავლობაში. არც ერთი და არც მეორე მოდელი სააკაშვილთან არ ჭრის, ეს კი ვერ გაიაზრეს. როდესაც არც ერთმა მეთოდმა არ იმუშავა, მათი კრეატიულობა ჩიხში შევიდა და არ იციან რა გააკეთონ“, - აღნიშნავს დიმიტრი შაშკინი.