„გამობრძანდეს ბატონი გაჩეჩილაძე და ბოდიში მომიხადოს!“ - კვირიკაშვილ-„უცნობის“ სატენდერო გარჩევები

პოლიტიკა - 12:13, 13 Dec, 2017

5822

საქართველოს პრემიერ-მინისტრი, გიორგი კვირიკაშვილი კარტელურ გარიგებებთან დაკავშირებით მისი და მთავრობის წევრების მიმართ გიორგი გაჩეჩილაძის მხრიდან წამოსულ ბრალდებებს გამოეხმაურა. კვირიკაშვილი გაჩეჩილაძე ურჩევს, სასამართლოს მიმართოს. როგორც კვირიკაშვილი აცხადებს, თუ სასამართლო დაადგენს, რომ მთავრობამ რამე არასწორად გააკეთა, მზადაა, პასუხისმგებლობა აიღოს და თანამდებობა დატოვოს.

„მისგან ასეთ დაუსაბუთებელ შეურაცხყოფას არ ველოდი და არ შევეგუები. არ შემიძლია, მოვისმინო ადამიანისგან ქება და ეს ქება კიდევ უფრო შეურაცხმყოფელი იყო, როდესაც ის შეურაცხმყოფლად იხსენიებს ჩემი გუნდის წევრებს. გავეცანი იმ საკითხს, როდესაც მან ჯანდაცვის სამინისტროს მიერ გამოცხადებულ ტენდერზე ისაუბრა. მინდა ვთქვა, რომ როდესაც ის დამიკავშირდა, მე მივეცი დავალება მთავრობის ადმინისტრაციას, რომ არ მომხდარიყო ისე, რომ არ დაჩაგრულიყო ვინმე და ყოფილიყო თანაბარი პირობები ყველასთვის. ტარიელ ხეჩიკაშვილი არაფერ შუაში იყო ამ ტენდერთან, სრულიად სხვა კომპანიამ გაიმარჯვა.

მეორე ის, რომ კანონი იყო ზედმიწევნით დაცული. მას შეუძლია, მიმართოს კონკურენციის სააგენტოს, რომ არ იყოს სპეკულაცია, რომ ამ სამსახურის ხელმძღვანელს ნიშნავს მთავრობის ხელმძღვანელი, მიმართოს სასამართლოსაც, თუ სასამართლო დაადასტურებს, რომ მთავრობა რამეში შეცდა, მზად ვარ, ავიღო პასუხისმგებლობა, მათ შორის დავტოვო თანამდებობა. თუ დადასტურდება, რომ ყველაფერი კანონიერი იყო, მაშინ გამობრძანდეს ბატონი გია გაჩეჩილაძე და ბოდიში მოუხადოს ტარიელ ხეჩიკაშვილსაც და მეც,“- განაცხადა გიორგი კვირიკაშვილმა.