ნახევარი მილიონი რეკლამისთვის - ხაბეიშვილი საახალწლო ღონისძიების ხარჯების შესწავლას აუდიტის სამსახურისგან ითხოვს

პოლიტიკა - 11:56, 13 Dec, 2017

1434

თბილისის საკრებულოს წევრი, „ერთიანი ნაციონალური მოძრაობიდან“, ლევან ხაბეიშვილი საახალწლო ღონისძიებებისთვის გამოყოფილი თანხის მიზნობრიობის შესწავლას აუდიტის სამსახურისგან ითხოვს.
ხაბეიშვილის განცხადებით, დედაქალაქის მერიამ საახალწლო განათებისთვის მილანურ კომპანიასთან 3 მილიონი ლარის ხელშეკრულება ტენდერის გარეშე გააფორმა, შემდეგ კი ასევე, ტენდერის გარეშე საახალწლო ღონისძიებებისთვის 2 700 000 ლარის დამატება მოითხოვა.
როგორც ხაბეიშვილი აცხადებს, ამ თანხიდამ ნახევარ მილიონზე მეტი მხოლოდ სარეკლამო მომსახურებისთვის დაიხარჯება:

„მაშინ, როდესაც სოციალურად დაუცველებისთვის 1,18 ლარი ეზედმეტა ქალაქის მერს და მათ მომავალი წლიდან 1,13 ლარით გამოკვებავენ, ამ დროს ნახევარ მილიონ ლარზე მეტის დახარჯვა საახალწლო ღონისძიებების მხოლოდ რეკლამისათვის მიგვაჩნია არაადეკვატურად. მივმართავთ სახელმწიფო აუდიტის სამსახურს, ამ ბრძანების შესაბამისად დაიწყოს მოკვლევა, რამდენად ადეკვატურია ამდენი თანხის დახარჯვა საახალწლო ღონისძიებებზე და ხომ არ გვაქვს საქმე საბიუჯეტო სახსრების გაფლანგვასთან. თბილისს არ აქვს იმის ფუფუნება და საშუალება, 566 000 ლარი სარეკლამო მომსახურებისთვის გამოყოს“, - განაცხადა ლევან ხაბეიშვილმა.