თბილისის მერი კახი კალაძე უფასო სასადილოების დაფინანსების შემცირებასთან დაკავშრებით განმარტებას აკეთებს. კახა კალაძე „ერთიან ნაციონალურ მოძრაობას“ სპეკულაციაში ადანაშაულებს და აღნიშნავს, რომ ცალკეულ შემთხვევებში თითო ბენეფიციარზე გამოყოფილი თანხის კლება, ტენდერში გამარჯვებული კომპანიის მიერ შეთავაზებული მომსახურების სიიაფემ გამოიწვია.

„ეს არის სპეკულაცია, მორიგი სიცრუე ოპოზიციის მხრიდან. არანაირი ბიუჯეტი არ შემცირებულა, 16 მილიონ 500 ათასი არის სოციალური მიმართულებით, კონკრეტულად უფასო სასადილოებისთვის. ის, რომ კონკურენცია იყო და კონკურსი ჩატარდა, აბა რა ვქნათ 3 ლარი იყოს და არ იყოს კონკურენცია კომპანიებს შორის? ეს კონკურენციის შედეგად მიღებულია. ყოველთვიურ რეჟიმში იქნება დაკვირვება, თუ რაიმე პრობლემა იქნება კვებასთან დაკავშირებით, რა თქმა უნდა, ჩვენი მხრიდან იქნება დახმარება,“ - განაცხადა კახა კალაძემ.