,,კალაძემ შრომითი ხელშეკრულებით კიდევ 25 ადამიანი დაასაქმა, მათი ანაზღაურების ჯამური რაოდენობა 1 მილიონი ლარია“

პოლიტიკა - 15:31, 12 Dec, 2017

2461

ოპოზიცია თბილისის მერს კახა კალაძეს ბიუროკრატიული ხარჯების შემცირებისკენ მოუწოდებს. მათი ინფორმაციით, ახლად არჩეული მერი შტატებს ზრდის.

საკრებულოს ფრაქცია ”ნაციონალური მოძრაობის” წევრმა მარიკა დათუკიშვილმა დღევანდელ ბრიფინგზე კალაძის მერ ხელმოწერილი ორი განკარგულება წარადგინა, რომლითაც 25 პირი შრომითი ხელშეკრულებით დასაქმდა. განკარგულებებში მითითებული არ არის ამ პირთა კონკრეტული თანამდებობრივი პოზიცია. ისინი ძირითადად მერიის ადმინისტრაციასა და სხვადასხვა საქალაქო სამსახურებში დასაქმდნენ.

დათუკიშვილის ინფორმაციით, მერიის მიერ წარმოდგენილი მომავალი წლის ბიუჯეტში შრომითი ანაზღაურების მუხლი 15 მილიონი ლარითაა გაზრდილი.

"კალაძემ 20 და 29 ნოემბერს გამოსცა განკარგულებები, რომლითაც 25 ადამიანი თანამდებობებზე დანიშნა. მათი ანაზღაურების ჯამური რაოდენობა 1 მილიონ ლარს შეადგენს. თვეში ამ პირთა ხელფასი განსაზღვრულია 4 000-დან 5 600-ლარამდე. ეს ერთი მილიონი ლარი თბილისელებმა ჩვენი ჯიბიდან უნდა გადავუხადოთ კალაძესთან აფილირებულ ადამიანებს. იმ ფონზე, როდესაც ცხოვრება გართულდა, როდესაც უფასო სასადილოებში სოციალურად გაჭირვებული ადამიანების გამოსაკვებად 1,18 ლარის ნაცვლად მერია 1,13 ლარით აპირებს გამოკვებას. კალაძე თავისი სამეგობროსთვის ხელფასებს ზრდის.

საშტატო რიცხოვნობის და შრომითი ხელშეკრულებით დასაქმებულთა რაოდენობა მომავალშიც, რომ მზარდი იქნება და კალაძე მხოლოდ ამით არ დაკმაყოფილდება, ამაზე მეტყველებს ის, რომ უკვე მის მიერ წარმოდგენილ ბიუჯეტის პროექტში, მუხლი რომლითაც შრომითი ხელშეკრულებით დასაქმებული ადამიანებისთვის თანამდებობრივი სარგოები უნდა გაიცეს, 15 მილიონი ლარით არის გაზრდილი. ეს ნიშნავს, რომ კალაძე პერმანენტულად გააგრძელებს თბილისის მერიის სტრუქტურებში თავისი ახლობელ-ნაცნობების დასაქმებას”, - განაცხადა დათუკიშვილმა.

ოპოზიცია, გენერალურ აუდიტორს მიმართავს დაინტერესდნენ აღნიშნული ფაქტებით.