2018 წლის ბიუჯეტი - კანონმდებლები ქვეყნის მთავარ საფინანსო დოკუმენტს მიმდინარე სასესიო კვირას კენჭს პირველი მოსმენით უყრიან. პროცედურა ხვალ გაიმართება. საფინანსო დოკუმენტს მხარს არ დაუჭერს ოპოზიცია, ისინი მიიჩნევენ, რომ პროექტში მთავრობის სტრუქტურული ცვლილებების შედეგად შესატანი ცვლილებები განხილვამდე უნდა ასახულიყო.

„მთავრობამ გამოაცხადა ოპტიმიზაცია, მაგრამ სინამდვილეში თანხები კი არ დაზოგა სამთავრობო ხარჯის მიმართულებით, არამედ პირიქით, გაზარდა და ამ ნამატშიც ერთი თეთრიც ვერ იპოვა ვერც პენსიის გასაზრდელად, ვერც დევნილების შემწეობის გასაზრდელად და ვერც შეზღუდული შესაძლებლობების მქონე პირთა დახმარების გასაზრდელად,“ - აცხადებს „ევროპული საქართველოს“ წევრი ზურაბ ჭიაბერაშვილი.

უმრავლესობა ბიუჯეტის დამტკიცებას დეკემბრის ბოლომდე გეგმავს:

„მიღებული საკანონმდებლო ცვლილებების პაკეტის შედეგად, სამთავრობო სტრუქტურებს აქვთ სამთვიანი ვადა იმისთვის, რომ გარკვეული ცვლილებები განახორციელონ თავიანთ სტრუქტურაში, რაც შესაძლებელია შემდეგ უკვე აისახოს 2018 წლის ბიუჯეტში. რაც შეეხება წარმოდგენილ ბიუჯეტს, რა ფორმითაც არის შემოთავაზებული, მე დარწმუნებული ვარ, რომ ამ ფორმით დაუჭერს პარლამენტი მხარს,“ - განაცხადა ვიცე სპიკერმა თამარ ჩუგოშვილმა.