"ადვოკატთა ასოციაციის სირცხვილი, არჩევნების ჩაშლას ცდილობდა" - ხატიაშვილი ადვოკატთა კორპუსიდან დავით ლანჩავას მოკვეთას ითხოვს

პოლიტიკა - 12:22, 11 Dec, 2017

1930

ადვოკატთა ასოციაციის თავმჯდომარე ზაზა ხატიაშვილი ადვოკატ დავით ლანჩავას არჩევნების ჩაშლის მცდელობაში ადანაშაულებს.

როგორც ზაზა ხატიაშვილმა სპეციალურ ბრიფინგზე აღნიშნა, დავით ლანჩავას ადვოკატთა კორპუსიდან უნდა მოიკვეთოს.

"ყველამ ნახა, როგორ შემოვარდა ლანჩავა, ჩქარა შუქი ქრებაო. 20 კაციანი დაცვა გვყავდა მობილიზებული, რომლებმაც გადაიტანეს ყუთები. იქ არჩევნები ვერ გაყალბდებოდა. ლანჩავა შეეცადა, მაგრამ არ გამოუვიდა. ეს არის სამარცხვინო ფაქტი. ადვოკატთა ასოციაციის ისტორიაში პირველად მოხდა, რომ კანდიდატი შემოვარდნილიყოს და ეყვიროს, არჩევნები ყალბდება და შუქი უნდა ჩაქრესო. შუქი არ წასულა. ეს იყო პოვოკაცია არჩევნების ჩაშლის მიზნით. მე ვაპირებ შევხვდე ყველა ადვოკატს, ვაჩვენო ლანჩავა რას აკეთებდა და ჩვენ ყველამ, დავით ლანჩავა უნდა მოვკვეთოთ ადვოკატთა კორპუსიდან.

დავით ლანჩავა არის ადვოკატთა ასოციაციის სირცხვილი. ყველამ ნახა, რომ არჩევნები სუფთად ჩატარდა, ამიტომ მე ვპირდები დავით ლანჩავას, ყველა ადვოკატს ვაჩვებებ, როგორ შლიდა არჩევნებს და საერთოდ, არც ერთი ადვოკატი, რომელსაც ღირსება ექნება, მას გამარჯობას აღარ ეტყვის", - აღნიშნა ხატიაშვილმა.

ცნობისთვის, ლანჩავა ამბობს, რომ არჩევნები გაყალბდა და ამ პროცესში უშუალო მონაწილეობას იღებდა ასოციაციის თავმჯდომარე ზაზა ხატიაშვილი.

ზაზა ხატიაშვილმა ბრალდების საპასუხოდ ამბობს: „კომისიის ერთ-ერთ წევრს აღმოაჩნდა ბიულეტენები და როცა ასოციაციის თავმჯდომარემ ეს გაიგო, გამოართვა და ადვოკატ ირმა ჭკადუას მისცა იმისთვის, რომ რაიმე კითხვები არ გაჩენილიყო“.