რობაქიძის საქმე - ირაკლი ფირცხალავას ადვოკატები კახაბერ აზარიაშვილის დაკითხვას ითხოვენ

პოლიტიკა - 11:37, 11 Dec, 2017

1602

ბუტა რობაქიძის საქმეზე ბრალდებულ პოლიციის ყოფილი მაღალჩინოსნის, ირაკლი ფირცხალავას დაცვის მხარე კახაბერ აზარიაშვილის მოწმის სახით დაკითხვას ითხოვს.

ადვოკატ კობა კობახიძის თქმით, აზარიაშვილი 2004 წლის 23 ნოემბერს განვითარებული მოვლენების შემდეგ, პოლიციას მიმართა დასაკითხად, თუმცა როგორც ადვოკატი ამბობს, საქმეში არ ჩანს, დაიკითხა თუ არა ეს ადამიანი, მაშინ როცა ამ საქმეზე ბუტა რობაქიძის ყველა მეგობარი დაკითხულია.
“ჩემი დაცვის ქვეშ მყოფმა, ირაკლი ფირცხალავამ წინა პროცესზე განაცხადა, რომ არიან მოწმეები, რომლებიც პროკურატურამ უნდა დაკითხოს. კონკრეტულად ის გულისხმობდა მოწმეს კახაბერ აზარიაშვილს, რომელმაც დაწერა განცხადება, რომ 2004 წლის 23 ნოემბერს დაკავებისას მას ჰქონდა მანქანაში დამალული „მაკაროვის“ ტიპის იარაღი და ითხოვდა დაკითხვას. პროკურატურას ეს ადამიანი დღემდე არ დაუკითხავს, ვინაიდან საქმეში არ ჩანს დაიკითხა თუ არა. ამიტომ ამ მოწმეს შეუძლია სასამართლოს მიაწოდოს ინფორმაცია იმის თაობაზე, ჰქონდა თუ არა მას მანქანაში იარაღი", - განაცხადა ადვოკატმა.

ცნობისთვის, „ნიუპოსტისთვის“ სასამართლოს დაწყებამდე ექსკლუზიურად გახდა ცნობილი, რომ ბრალდების მხარე ბუტა რობაქიძის საქმის მოწმეს მალავდა, ანუ წყაროს ინფორმაციით, 2004 წლის 23 ნოემბერს ავტომანქანაში, გარდაცვლილ ბუტა რობაქიძესთან ერთად, კიდევ ერთი პიროვნება იმყოფებდა, თუმცა მიუხედავად იმისა, რომ ამ საქმეზე ხელახალი გამოძიება რამდენიმე წელია მიმდინარეობს, პროკურატურას აღნიშნული პიროვნება არ დაუკითხავს.

სხვათა შორის, წყარომ „ნიუპოსტს“ ფოტოც მოაწოდა, რომელიც ზემოხსენებული ინციდენტის დროსაა გადაღებული და რომელზეც ნათლად ჩანს, რომ პოლიციას ახალგაზრდა მამაკაცი ჰყავს დაკავებული. როგორც წყარო ამბობს, სწორედ ეს ახალგაზრდა მამაკაცი, კახა აზარიაშვილია მოწმე, რომელსაც პროკურატურა მალავს.