კანონმდებლები დღეს ბიუროს სხდომაზე 2018 წლის ბიუჯეტის პროექტზე იმსჯელებენ. მთავარი საფინანსო დოკუმენტი 2017 წლის დეკემბრის ბოლომდე უნდა იქნეს დამტკიცებული. ბიუჯეტის აღნიშნულ ვერსიაში არ იქნება ასახული კონკრეტულად რამდენი დაიზოგება მთავრობის სტრუქტურული ცვლილებების შედეგად. როგორც დეპუტატები აცხადებენ, ბიუჯეტი დასრულებულ სახეს საგაზაფხულო სესიაზე მიიღებს:

„30 მილიონიანი ზრდა გვაქვს კულტურის მიმართულებით, ასევე იზრდება მნიშვნელოვნად განათლების მიმართულებით დაფინანსება და რაც მთავარია, სახელმწიფო ენის დეპარტამენტისთვის იქნება გამოყოფილი შესაბამისი რესურსი, რომ დეპარტამენტმა დაიწყოს ფუნქციონირება,“ - ამბობს „ქართული ოცნების“ წევრი მარიამ ჯაში.

ბიუჯეტის პროექტს მხარს არ უჭერს ოპოზიცია.

„ბიუჯეტში არის ძალიან ბევრი ცუდი ხარჯი, რომელიც ვერ შეუწყობს ხელს ქვეყანაში ფინანსურ, ლარის და ფასების სტაბილურობას,“ - განაცხადა "ენმ"-ის წევრმა რომან გოცირიძემ.

საპარლამენტო უმცირესობის განმარტებით, ხარჯები მთავრობას ცვლილებების განხორციელებამდე უნდა დაეთვალა.

„მთავრობა ზრდის ბიუჯეტს, მაგრამ ერთ თეთრსაც ვერ ნახულობს ვერც პენსიის გასაზრდელად, ვერც დევნილების შემწეობის გასაზრდელად, ვერც შეზღუდული შესაძლებლობების მქონე პირების დახმარებისათვის. ამ საყოველთაო გაჭირვებაში მთავრობა არაფერს არ აპირებს, რომ საზოგადოების ყველაზე დაუცველ ფენებს დაეხმაროს,“ - აცხადებს „ევროპული საქართველოს“ წევრი ზურაბ ჭიაბერაშვილი.