სააკაშვილის დაპატიმრება და მოსალოდნელი სცენარი - ენმ-ის გეგმები პოლიტსაბჭოს საგანგებო სხდომის შემდეგ გახდება ცნობილი

პოლიტიკა - 18:29, 09 Dec, 2017

1233

ამ წუთებში „ნაციონალური მოძრაობა“ მიხეილ სააკაშვილის დაკავებასთან დაკავშირებულ სამოქმედო გეგმაზე პოლიტსაბჭოს ფორმატში მსჯელობს.

ენმ-ს ერთ-ერთი ლიდერის ზაზა ბიბილაშვილის თქმით, მოძრაობა ყველანაირ სცენარს განიხილავს და შესაბამისი მოქმედებისთვისაც მზად არის.
"ეს შეხვედრა ეძღვნება იმ მოვლენებს, რომელიც ბოლო 24 საათის განმავლობაში ვითარდება კიევში. იმ ლაჩრულ საქციელს რომელსაც ვხედავთ უკრაინის ოლიგარქიული ხელისუფლებისგან. მინდა ყველას და პირველ რიგში საქართველოს ოლიგარქს - ივანიშვილს ვუთხრა, რომ ნაციონალური მოძრაობა ყველანაირი სცენარისთვის მზად არის. დღეს განვიხილავთ სხვადასხვა ვარიანტებს, მზად ვართ მოვლენების ყველანაირი განვითარებისთვის. აქვე მხარდაჭერა მინდა გამოვუცხადო იმ ადამიანებს რომლებიც უკრაინაში კორუფციული და ოლიგარქიული მმართველობის წინააღმდეგ იბრძვიან, დარწმუნებული ვარ რომ უკრაინასა და საქართველოში კეთილსინდისიერი ძალები გაიმარჯვებენ. სააკაშვილი ამბობს, რომ მისი სიცოცხლე ეკუთვნის უკრაინას და საქართველოს. მისი სიცოცხლე არის იდეა, ბრძოლა ანტირუსული, კორუფციული ინტერესების წინააღმდეგ. ამ ბრძოლაში უკრაინელი და ქართველი ხალხი აბსოლუტურად ერთიანია ჩვენი ხალხები ამ ბრძოლაში ძალიან მალე გაიმარჯვებენ"- აღნიშნა ბიბილაშვილმა.
ზურაბ მელიქიშვილის თქმით, პარტიის სამოქმედო გეგმა სხდომის დასრულების შემდეგ გახდება ცნობილი.

"ნაციონალური მოძრაობა" ბოლო დღეების განმავლობაში არსებული გამოწვევებიდან გამომდინარე, გადასულია მუშაობის საგანგებო რეჟიმზე. საგანგებოდ მოვიწვიეთ მმართველი პოლიტიკური საბჭო, რათა საბოლოოდ შევჯერდეთ ყველა იმ ნაბიჯზე, რომელიც შესაძლებელი იქნება, რომ გადაიდგას ჩვენი მხრიდან იმ გამოწვევების საპასუხოდ, რომელიც გაჩნდა, განსაკუთრებით მას შემდეგ, რაც "ნაციონალური მოძრაობის" ლიდერი მიხეილ სააკაშვილი უკრაინაში ოლიგარქმა დააკავა. განხილული იქნება ყველა ის შესაძლო სცენარი, რომელიც ადეკვატურ პასუხს მოითხოვს უშუალოდ "ნაციონალური მოძრაობის" მხრიდან", - განაცხადა მელიქიშვილმა.