,,როცა საქართველოს მესამე პრეზიდენტი პოლიტიკურ ტყვეობაშია, დასავლური პოლიტიკური ძალები ვალდებულნი ვართ, ვიმოქმედოთ“

,,როცა საქართველოს მესამე პრეზიდენტი პოლიტიკურ ტყვეობაშია, დასავლური პოლიტიკური ძალები ვალდებულნი ვართ, ვიმოქმედოთ“ - ბაჩუკი ქარდავა

პოლიტიკა - 15:40, 09 Dec, 2017

2623

მიხეილ სააკაშვილის კიევში დაპატიმრებას ეხმაურება ეროვნულ-დემოკრატიული პარტიის ლიდერი ბაჩუკი ქარდავა, რომელიც ამბობს, რომ საქართველოს მესამე პრეზიდენტი დღეს პოლიტიკურ ტყვეობაშია.

"ერთი რამ ცალსახად უნდა დავაფიქსიროთ - მიხეილ სააკაშვილი დღეს პოლიტიკურ ტყვეობაშია, ამას წყალი არ გაუვა, ეს ფაქტია და მთელი მსოფლიოსთვის ცნობილია.

ნუ დაგვავიწყდება, რომ სააკაშვილი საქართველოს მესამე პრეზიდენტია და როცა უკრაინის გაკოტრებული ხელისუფლება სააკაშვილს პოლიტიკურ ტყვეობაში ამყოფებს, საქართველოს ხელისუფლება ვალდებულია, ქმედითი ნაბიჯები გადადგას, თუ რა თქმა უნდა თვითონ მაინც არ თვლის თავს ისეთივე გაკოტრებულად, როგორიც პოროშენკოა. დღეს პუტინის მოკავშირეები სწორედ ოლიგარქიული სისტემებია და ეს სისტემები საქართველოსა და უკრაინაში სამწუხაროდ ფესვგადგმულია.

ამასთან, მინდა საზოგადოებამაც იცოდეს, რომ მიხეილ სააკაშვილთან დაკავშირებული პოზიცია, მხოლოდ ნაციონალური მოძრაობისა და მისი მხარდამჭერების საქმე არ არის. ის საქართველოს პრეზიდენტი იყო და როდესაც მის მიმართ მსგავსი ნაბიჯები იდგმება, ნებისმიერი დასავლური, დემოკრატიული პოლიტიკური შეხედულების ძალები ვალდებულნი ვართ, ვიმოქმედოთ“ - აცხადებს ედპ-ს ლიდერი.

ქარდავა ამბობს, რომ სამოქმედო გეგმა დამოკიდებული იქნება იმაზე, თუ როგორ განვითარდება მოვლენები.

,,ჩვენ გვაქვს სამოქმედო გეგმა, დარწმუნებული ვარ, რომ პროდასავლურ ძალებში არიან იქნებიან მოკავშირეები. გვაქვს წინასწარი კონტაქტები, დაველოდებით თუ როგორ განვითარდება მოვლენები და ამის მიხედვით ვიმოქმედებთ"- აღნიშნა ბაჩუკი ქარდავამ.

მისივე თქმით, საქართველოს მესამე პრეზიდენტის პოლიტიკური მოტივებით ტყეობაში ყოფნა დაუშვებელია და შეურაცხყოფაა ჩვენი სახელმწიფოსთვის.

,,ამ ქვეყანაში ძალიან ცუდი პრაქტიკა მკვიდრდება. 95%-ით ვირჩევთ პრეზიდენტებს, შემდეგ ან ვკლავთ ანდა სხვა ქვეყნებში აპატიმრებენ და პოლიტიკური მოტივებით, ესა თუ ის ხელისუფლებები და საზოგადოების გარკვეული ნაწილი ამას ინერტულად უყურებს. თუ ჩვენ გვინდა რომ შევდგეთ, როგორც სახელმწიფო, ამ ვითარებაში მკვეთრი რეაქციები უნდა გვქონდეს. ამ რეაქციებზე საქართველოს ხელისუფლებამ იფიქროს, თუ რა თქმა უნდა ისეთივე გაკოტრებული არ არის, როგორც პოროშენკოს ხელისუფლება. პოროშენკოს ამბავი დამთავრებულია, ის არის იმ მდგომარეობაში, როცა მას სვლა აღარ აქვს. მან ყველაზე სულელური ნაბიჯი გადადგა. საქართველოს ხელისუფლება რაც არ უნდა მას სააკაშვილის მიმართ ბოღმა ამოძრავებდეს, უკრაინის პრეზიდენტს არ უნდა გადაჰყვეს“ - აცხადებს ქარდავა.

რაც შეეხება უკრაინის ხელისუფლებას, ქარდავა დარწმუნებულია, რომ უკრაინის პრეზიდენტის დღეები დათვლილია.

"ერთ რამეში ნამდვილად დარწმუნებული ვარ - პოლიტიკური ლოგიკა და პოლიტიკური კანონზომიერება არასდროს, არცერთ დროში და არცერთ ქვეყანაში არ ყოფილა სხვაგვარი - როდესაც ხელისუფლება ისეთ ნაბიჯზე მიდის, როგორიც ეს იყო სააკაშვილის დაპატიმრება, ასეთი ხელისუფლება მხოლოდ დღეებს, მაქსიმუმ თვეებს იგებს და ასრულებს თავის მოღვაწეობას. ამას ველოდები უკრაინაში, რაც პუტინის კარზე მოთამაშეებისთვის მომგებიანი ნამდვილად არ იქნება" - აღნიშნა ბაჩუკი ქარადავამ.