მიკაილ კადიევი თავშესაფრის თხოვნით ლტოლვილთა სამინისტროს კიდევ ერთხელ მიმართავს

პოლიტიკა - 15:02, 08 Dec, 2017

1226

დაღესტნელი სამოქალაქო აქტივისტი მიკაილ კადიევი თავშესაფრის თხოვნით, ლტოლვილთა და განსახლების სამინისტროს კიდევ ერთხელ მიმართავს. უფლებადამცველი სამინისტროში დღეს ადვოკატთან და ევროპული საქართველოს ერთერთ ლიდერთან, სერგო რატიანთან ერთად მივიდა. დაღესტნელი უფლებადამცველი უკვე 4 წელია საქართველოში თავშესაფარს ითხოვს.

კადიევის უფლებადამცველის განცხადებით, კანონის ახალი რედაქცია, რომელიც ევროკავშირის სტანდარტებს აკმაყოფილებს, საერთაშორისო დაცვის და ლტოლვილის სტატუსის მიღების მეტ შესაძლებლობას იძლევა.

“ახალი კანონი იძლევა გაცილებით მეტ საშუალებას მისი უფლებების დაცვის. ის არის შესაბამისობაში საერთაშორისო სტანდარტებთან და აგრეთვე ევროკავშირის ასოცირების ხელშეკრულებასთან. შესაბამისად, დღეს უკვე ახალი კანონის საფუძველზე შემოგვაქვს განცხადება, რომ მას მიანიჭონ თავშესაფარი,“ - განაცხადა ადვოკატმა მალხაზ პატარაიამ.

კადიევის თქმით ის რუსეთის ხელისუფლების მიერ, დაღესტანში ადამიანის უფლებების დასაცავად მისი სამოქალაქო აქტივობების და განსხვავებული რელიგიური მრწამსის გამო იდევნება. რუსეთის პროკურატურამ კადიევის ექსტრადირება უკვე ორჯერ მოითხოვა. მას მოსკოვში მკვლელობაში ადანაშაულებენ.

საქართველოს ლტოლვილთა სამინისტრო თავის დასკვნაში კადიევისთვის ლტოლვილის სტატუსის მინიჭებაზე უარის თქმის ერთ–ერთ გარემოებად, რუსეთის გენერალური პროკურორის მოადგილის წერილობით გარანტიას ასახელებს, სადაც ნათქვამია, რომ კადიევი რუსეთში ექსტრადირების შემთხვევაში არ დაექვემდებარება წამებას ან არაადამიანურ მოპყრობას.