კალაძეს პროკურატურაში უჩივიან - ,,ყველა ბიუჯეტის წურბელა კანონის სიმკაცრით აგებს პასუხს"

პოლიტიკა - 11:42, 08 Dec, 2017

14080

"ნაციონალური მოძრაობა" საახალწლო განათებებზე თბილისის ბიუჯეტიდან გაწეული დანახარჯის მიზნობრიობის გამოძიებას ითხოვს. ლევან ხაბეიშვილმა შესაბამისი განცხადებით გენერალურ პროკურატირას უკვე მიმართა.

ხაბეიშვილის თქმით, პირდაპირი შესყიდვის წესით, ტენდერის გარეშე ილუმინაციების შეძენა კორუფციული გარიგებებით მოხდა.

„ძალიან მარტივი საგამოძიებო მოქმედებები უნდა ჩაატაროს საქართველოს პროკურატურამ, უნდა დაადგინოს, როგორ მოხდა ამ კომპანიის გამორჩევა მილიონობით კომპანიისგან, რომელიც მსოფლიოში არსებობს და რაღა მაინც და მაინც იტალია და მილანი. ვისი პირადი კონტაქტებია, ვინ მოითხოვა ამ ხელშეკრულების გაფორმება და რატომ მოხდა ისე, რომ სამჯერ მეტი თანხა იხარჯება თბილისის განათებაში წელს, 3 მილიონი ლარი, ვიდრე დახარჯულა ოდესმე,“ - აცხადებს "ენმ"-ის წევრი ლევან ხაბეიშვილი.

მისი თქმით, კალაძის მიერ დავით ნარმანიისკენ ხელის გაშვერა უხერხულია.

“კახი კალაძის განცხადებას, რომ მან ფაქტობრივად გადააბრალა დავით ნარმანიას და თქვა, რომ თურმე ნარმანიამ მოიძია მილანური კომპანია, უხერხულია. კახა კალაძე პირად კონტაქტებს აბრალებდეს ნარმანიას, მაშინ, როდესაც შესაძლოა, საერთოდ რუკაზე ვერ იპოვოს მილანი დავით ნარმანიამ. ამიტომ, გამოძიებამ გასცეს პასუხი, როგორ მოხდა ამ კომპანიის შერჩევა, როგორ დაემთხვა, რომ ეს კომპანია არის მილანური და როგორ ხდება, რომ სამჯერ მეტ თანხას ვხარჯავთ, ვიდრე ოდესმე დახარჯულა,“ - განაცხადა ხაბეიშვილმა.

"ნაციონალური მოძრაობის" წევრი დარწმუნებულია, რომ ბიუჯეტის არამიზნობრივად დახარჯავის გამო ხელსიუფლების წარმომადგენლები აუცილებლად წარსდგენიან კანონის წინაშე.

„რაც შეეხება გამოძიების ობიექტურობას, ამ საქმეს გამოიძიებს თუ არა პროკურატურა, ნაკლებ მნიშვნელოვანია. ეს საქმეები იდება თაროზე, მოვა ხელისუფლება, რომელიც აუცილებლად გადახედავს ყველა იმ საქმეს, რომელზეც მასალები გვაქვს შემოტანილი და აუცილებლად ვისაც წაუცდა ბიუჯეტზე ხელი, ყველა ბიუჯეტის წურბელა კანონის სიმკაცრით აგებს პასუხს,“ - განაცხადა ენმ-ს ერთ-ერთმა ლიდერმა.