ახალი სახალხო დამცველი ხორავას ქუჩაზე მოხმდარ მკვლელობაში ბრალდებულთა მონახულებას გეგმავს

პოლიტიკა - 11:48, 08 Dec, 2017

1748

საქართველოს ახალმა სახალხო დამცველმა სამომავლო გეგმებსა და იმ პრიორიტეტებზე ისაუბრა, რომელიც მას ომბუდსმენობის 5-წლიანი ვადის განმავლობაში ექნება. ლომჯარიას თქმით, გეგმავს კიდევ უფრო გაძლიერდეს სახალხო დამცველის მუშაობა, მათ შორის, ქალთა, შშმ პირებისა და დასაქმებულთა უფლებების დაცვის კუთხით.

„სამოქალაქო და პოლიტიკურ უფლებებთან ერთად, ჩემთვის პრიორიტეტი იქნება ასევე, სოციალური და ეკონომიკური უფლებებიც. ვაპირებ, რომ განსაკუთრებით გავაძლიერო ბავშვთა უფლებების მიმართულებით სახალხო დამცველის საქმიანობა, ასევე ქალთა უფლებების დაცვა, შეზღუდული შესაძლებლობის მქონე პირთა უფლებების დაცვა. ასევე, ვაპირებ, რომ კიდევ უფრო გაძლიერდეს სახალხო დამცველის მუშაობა მათ შორის, ჯანსაღ გარემოში ცხოვრების უფლებასთან მიმართებით, ასევე დასაქმებულთა უფლებების დაცვა, როგორც ერთ-ერთი პრიორიტეტი საზოგადოებისთვის იქნება ასევე ჩვენთვის ერთ-ერთი მთავარი მიმართულება. ვაპირებ, გავაძლიერო რეგიონალური ოფისების საქმიანობა ასევე, თავად აპარატისთვის შევქმნა ღირსეული სამუშაო პირობები,“-განაცხადა ნინო ლომჯარიამ.

ნინო ლომჯარიას თქმით, სახალხო დამცველის აპარატის ერთ-ერთი პრიორიტეტი, ყველა იმ საქმის შესწავლა იქნება, რაც არასრულწლოვანთა შორის ძალადობას უკავშირდება. ომბუდსმენის თქმით, ხორავას ქუჩაზე მომხდარმა მკვლელობამ კიდევ ერთხელ წარმოაჩინა ის პრობლემები, რაც ბავშვთა უფლებების თვალსაზრისით არსებობს. ლომჯარიას თქმითვე, გეგმავს, მოინახულოს დაკავებულები და გაეცნოს საქმის მასალებს.

„მიუხედავად იმისა, რომ სახალხო დამცველის აპარატი მუშაობს დიდი ხანია ბავშვთა უფლებებზე, ალბათ ამ ძალიან ტრაგიკულმა შემთხვევამ კიდევ ერთხელ ძალიან მწვავედ წარმოაჩინა ის პრობლემები, რაც არსებობს ბავშვთა უფლებების თვალსაზრისით, სკოლაში არსებული სიტუაციები. ამიტომ, რა თქმა უნდა, ყველა იმ საქმის შესწავლა, რაც დაკავშირებულია არასრულწლოვანთა შორის ძალადობასთან, იქნება პრიორიტეტი და რა თქმა უნდა, ერთ-ერთი პირველი საქმე, რითაც დავინტერესდები," - განაცხადა ნინო ლომჯარიამ.