GWP-ს თანამშრომლებს ნარკოტესტირებას უტარებენ - რას აცხადებს „თეთრი ხმაური“ და რას პასუხობს კომპანია

პოლიტიკა - 13:44, 07 Dec, 2017

1481

„თეთრი ხმაურის მოძრაობის“ ინფორმაციით, კომპანია GWP-ს თანამშრომლები სამხარაულის ექსპერტიზის ბიუროში ნარკოტესტირებაზე გადაჰყავთ. ამავე წყაროს თქმით, რამდენიმე დღის წინ ინციდენტი მოხდა - ერთ-ერთ თანამშრომელს დაუდგინდა მარიხუანას მოხმარება, რის გამოც ის სამსახურიდან გაუშვეს. „თეთრი ხმაურის მოძრაობა“ აღნიშნულს თანამშრომლების დაშინებად აფასებს.

„მათ შეიძლება, ლუკმა-პური დაკარგონ, რადგან შეიძლება, „ამოვარდეს“ მცირე ალკოჰოლი და ნარკოტიკული საშუალების მოხმარება. ეს უმსგავსო საქციელია კომპანიისგან,“ - აცხადებს დავით სუბელიანი.

აღნიშნულ ფაქტს კომპანია GWP-ის განცხადებით გამოეხმაურა და თანამშრომლების შემოწმების მიზნად უსაფრთხოების დაცვისა და პრევენცია დაასახელა:

„ჯორჯიან უთერ ენდ ფაური ეხმაურება თეთრი ხმაურის მოძრაობის აქტივისტის დავით სუბელიანის განცხადებას და აცხადებს, რომ ჯივიპი არის ქვეყნის სტრატეგიული ობიექტი, რომელიც სასმელი წყლით უზრუნველყოფს ქალაქ თბილისს. თანამშრომელთა უმეტესობა ყოველდღიურად ასრულებს მაღალი რისკის შემცველ ტექნიკურ სამუშოებს, მართავს მძიმე სპეცტექნიკას და მუშაობს მიწისქვეშა კომუნიკაციებზე. ჩვენ პასუხისმგებელი ვართ თითოეული თანამშრომლის სიცოცხლის უსაფრთხოებაზე, ასევე იმ არეალზე, სადაც მიმდინარეობს სამუშაო პროცესი. სტრატეგიულ ობიექტებზე, რისკის შემცველი სამუშაოს შესრულების დროს სახიფათოა თანამშრომლების მიერ ალკოჰოლური, ნარკოტიკული ან ფსიქოტროპული საშუალებების გამოყენება.

გამოვლინდა რამდენიმე კონკრეტული შემთხვევა, როდესაც არაფხიზელ მდგომარეობაში მყოფი თანამშრომლები ასრულებდნენ სწორედ ასეთი ტიპის ტექნიკურ სამუშოებს. მათი და მათ გვერდით მომუშავე თანამშრომლების უსაფრთხოების დაცვის და პრევენციის მიზნით, კომპანიამ შეამოწმა მათი მდგომარეობა.

ჯორჯიან უოთერ ენდ ფაუერის პრიორიტეტია თითოეული თანამშრომლისთვის უსაფრთხო სამუშაო გარემოს შექმნა.“- აღნიშნულია განცხადებაში.