საქართველოს მესამე პრეზიდენტმა, მიხეილ სააკაშვილმა მხარდამჭერებს სიტყვით მიმართა და აღნიშნა, რომ უკრაინაში მშვიდობიანი გზით მოხდება ოლიგარქების დიქტატურის დასრულება და გაიმარჯვებს თავისუფლება.

სააკაშვილის განცხადებით, უკრაინის პრეზიდენტს სურდა პროვოკაციის მოწყობა და ძალის დემონსტრირება, მაგრამ ეს არ გამოუვიდა:

„იური ლუცენკოს არ მივიჩნევ უკრაინის გენერალურ პროკურორად, მას არ აქვს იურიდიული განათლება და არ აქვს უფლება, მუშაობდეს ამ თანამდებობაზე, განსაკუთრებით, მაიდანის შემდეგ, ლუცენკო - ეს არაფრისმაქნისი ამბობს, რომ მიხეილ სააკაშვილი რუსეთის სპეცსამსახურების აგენტია, სწორად დაწერა კარლ ბილდტმა, არავინ მსოფლიოში ამას სიმართლედ არ მიიღებს. ის, რაც გააკეთა პოროშენკომ, მისი დასასრულის დასაწყისია, ეს არის მაფიოზური დაჯგუფების დასასრული და ახალი უკრაინის დასაწყისი.

მათ ისტერიულად სურთ, დამაშორონ ხალხს, ეს არ არის „მიხო-მაიდანი“, ეს არის უკრაინელების ბანაკი უკრაინელი ხალხისთვის, მათ სურთ, ეს აქციონ ისტორიად ჩემზე, მე აქ ხალხისთვის ვარ!

მე გამოვაცხადებ გეგმებს, მოვაშოროთ დანაშაულებრივი დაჯგუფებები და დავიწყოთ პოროშენკოს დანაშაულებრივი ჯგუფის იმპიჩმენტის საორგანიზაციო საკითხები. მათ გუშინ მოაწყვეს პროვოკაცია, თუ სურდათ ჩემი დაჭერა, არ იყო პრობლემა - დავდივარ დაცვის გარეშე. პოროშენკოს გუშინ ძალის დემონსტრირება სურდა და წააგო, დღეს სპეცსრაზმი, რომელიც თავს დაესხა ამ ხალხს, ჩემი ყურით მოვისმინე, ყველაფერი ეს ერთი ადამიანის გამო ხდებაო, ყველაფერი ეს პოროშენკოსთვის ხდებაო, ყვიროდა ის. ამიტომ, როდესაც ჩვენ ბევრი ვიქნებით, ეს ადამიანები, ეს პოლიციელები, სპეცრაზმელები, ხალხთან ერთად, პარლამენტის მხარდაჭერით, გადატრიალების გარეშე, ძალადობის გარეშე, დაამყარებენ ქვეყანაში მშვიდობას, დემოკრატიას. დაასრულებენ ოლიგარქების დიქტატურას, ჩვენ გვექნება დიქტატურა, მაგრამ კანონისა და უფლებების დიქტატურა, თავისუფლებისა და უკრაინის დიქტატურა, უკრაინელი პატრიოტების დიქტატურა, ეს არის ნამდვილი დემოკრატია, მაგრამ ოლიგარქების დიქტატურა უკრაინაში აღარ იქნება“, - განაცხადა მიხეილ სააკაშილმა.